今時今日個個都上網睇新聞，唔少新聞機構發展多媒體嘅新聞製作，但紙媒喺世界新聞業仍有佢嘅角色同地位，印刷、設計精美、有紀念價值嘅雜誌封面、報紙頭版仲有好多讀者搶購收藏，所以《蘋果》仍然堅持製作優質嘅報紙畀讀者。除咗新聞內容之外，排版、印刷都好用心製作㗎！屬於印刷、出版同設計業年度盛事嘅第31屆香港印製大獎頒發「報紙印刷組」優異獎畀《蘋果》，代表《蘋果》排版印刷備受業界肯定，真係恭喜晒印刷嘅同事啦！
頒獎禮因疫情取消
「香港印製大獎」係全港最具規模同埋反映本港出版、印刷技術同設計嘅比賽，個比賽嘅原意就希望鼓勵本港印刷、出版同埋相關行業，不斷製作優良同富競爭能力嘅印刷品，以往大會方面會搞個頒獎禮，不過今年就因為疫情緣故，所以大會就取消咗頒獎典禮。