邵音音與媽媽都命途坎坷，兩個都遇上壞男人，猶幸女兒Jean與女婿波多野裕介的婚姻美滿，延續她破碎的公主王子美夢，更大讚奪得金像獎最佳原創電影音樂獎的配樂師女婿︰「我女婿係好有教養嘅人，佢嘅乖唔係假，佢將我當親人，會分享自己開心唔開心，所以佢喺屋企唔會變咗法國大餐多嚿魚，佢真係畀好多快樂同幸福我哋，佢對我個女好好，連貓、狗都錫。」
音音姐說女婿生活簡單，只愛作曲，可以22個鐘不吃不喝只創作︰「佢思潮嚟嗰陣可以困自己喺錄音室一日，見到都肉赤，但我哋唔會騷擾佢。」問音音姐想不想抱孫？她說︰「我唔恨！香港環境唔好，加上個女同女婿太鍾意做音樂，佢哋開心就好，唔使要下一代。」
皮膚癌陀仔險死
談到子女，音音姐說覺得對不起子女，所以加倍愛他們，原來當年音音姐懷第一胎時，醫生得悉她曾患皮膚癌時，便提議她終止懷孕，皆因懷孕時皮膚癌很大機會復發，可能連胎兒都受影響，她聽後晴天霹靂︰「醫生要我落（仔），但個肚咁大我唔捨得，醫生要我簽字，將來我同BB有事都同佢醫院冇關。」最後她早產半個月︰「我當時真係好驚，分分鐘都驚死，日日匿埋喊，唔敢話畀阿媽知，驚死呀，驚死驚到要死，個女同個仔出世後百天，都呼吸困難，不停咁扯蝦。」問到生第一胎已如此危險，為何還夠膽再陀第二胎，音音姐說︰「意外箒！我陀佢哋日日喊，見到佢哋扯蝦，真係好對唔住，所以要加倍愛佢哋。」