【娛樂人物】現年69歲的邵音音新年檔期到馬來西亞為賀歲片《新年泰瘋狂》宣傳後，返港後疫情開始嚴重，音音姐指上半年本來要馬不停蹄出埠拍戲，但因為疫情取消行程，剛巧長居美國的90歲母親Rose隨她赴波蘭攞影后，便索性留母親在港幾個月，音音姐回想昔日母親遭家暴，童年受盡欺凌，長大後又與母親聚少離多，兩母女難得重拾天倫樂。
採訪：祖李
攝影：林德雄
邵音音去年10月在美國家格倫代爾國際電影節上憑藉微電影《老奶奶與無名子》勇奪影后之後，11月30日於波蘭當地時間，又憑同一部影片獲得波蘭電影節「外語片最佳女主角」，最令她開心的，是90歲的母親Rose同行齊齊領獎，女兒也在場見證，音音姐坦言在當地留下人生最快樂的回憶。
因工作被迫分兩地
這幾個月，音音姐與母親日夕相對，更齊齊過母親節，好好感受母愛。音音姐說︰「我真係超級開心，自小就夢想可以一家人快樂生活，但之前因為工作，次次都被迫分開，喺波蘭我真係充份享受到天倫之樂，可以孝順下阿媽。」在電影圈打滾數十年，終於一嘗影后滋味，是否已無憾，她說︰「唔係㗎！奧斯卡都未攞，呢個又係另一個夢想，我DNA好嘛！」
訪問當日，音音姐與母親、女兒三代同堂，更有女婿波多野裕介隨行，一家人開開心心影合照。音音姐母親說多年來對女兒很嚴，明知女兒孝順，試過多日不吃飯，將飯錢剩下給媽媽買靚茶具，她也不會讚女兒一句，她說︰「我從來冇讚過佢，佢難得買咁名貴嘅嘢畀我，但我仲話佢嘥錢。我遇人不淑，佢老竇唔負責任，我嗰陣一個女人養大三個細路，生活好艱難。」音音姐說︰「我阿媽乜都係為咗我哋，無論我哋點反叛，佢都咁愛我哋，佢將最好嘅畀我哋。我媽好怕事，佢要保護仔女就變得好怕事，乜都忍，但我唔同，我會報仇。」
當年音音姐一家由香港移居台灣時，還未夠6歲，她坦言童年受盡欺凌︰「嗰陣台灣人好抗拒我哋，叫我哋『死豬』，我日日拖住細佬，孭住細妹返學，冇錢搭車，次次都要掹人衫尾上車，日日喺惶恐中度過，成日驚俾人趕落車，初初去到又唔識講國語，其他同學睇我唔起，試過俾同學阿媽用掃把趕我哋。」
認戇居嫁錯負心郎
音音姐母親當年在台灣的美軍顧問團內打工，70年代就移民美國，當時未夠20歲的音音姐就沒跟媽媽離開，反而留下拍電影，所以母女長時間都分開。音音姐說當年年少無知，簡直是「戇居」，從被騙拍風月片到嫁錯負心男陳耀發，音音姐總是將痛苦隱藏，從未告知母親，她說︰「自己已經衰咗，仲點敢同佢講。」70年代，Rose第一次返港探女兒時，還以為女兒拍電影出人頭地，她說︰「我第一次返香港好開心，個女畀咗好多錢我，我喺酒店周圍派貼士畀侍應，以為個女發財，點知佢私下同我講，快啲走，我問點解︰『佢話慳得一蚊就一蚊』，我至知原來佢風光背後咁辛酸。」
音音姐嘆︰「我份人冇戒心，以為喺我身邊所有甜言蜜語嘅都是好人，老千要嚟呃你，佢可以包裝得好好，令你相信自己係白雪公主，好幸運咁撞到白馬王子，當你知道嗰陣撼頭自盡……都後悔啦。」當年眼看父親經常對母親動粗，問到會否憎恨他，音音姐說︰「我都冇愛佢，點會恨？佢恰我阿媽恰到死，我唔識佢，同我無關。」
場地提供：張公館花園