國安法仍有待實施，特區政府在5月30日宣佈委任工聯會議員何啟明做勞福局副局長，民建聯成員葉俊廉做財庫局政治助理，好明顯係一方面中央要威嚇香港知識份子，另方面就靜靜雞替特區政府安排新一代管治官員。以後政府高官分工好清楚嘞，就係AO做事務官，局長副局長政治助理呢類政治決策職位就由工聯會民建聯嘅成員逐步替代、上位。勞福局掌管勞工福利，對民生至為重要，泛民之職工盟致力開拓新工會組織，爭取基層選票，依家副局長由何啟明負責，職工盟仲想有甜頭？難啲咯，想註冊新工會，等到2047啦！
一個網站訪問何啟明，問佢做副局長有乜感受，佢竟然答：「千斤擔子兩肩挑，趁青春，結隊向前行」，即時顯露咗佢係新亞人，翻查資料，何啟明係2007年中大新亞書院畢業生，主修哲學，2008年得中大教育文憑，做過老師，加入工聯會，應咗左丁山在本欄時常講嗰句：「青年才俊想快啲上位，一定要加入工聯會民建聯」，周浩鼎呢類LSE校友如是，麥美娟何啟明呢類新亞校友亦如是，另一位新亞佬林卓廷，選擇加入民主黨，當然一世冇官做。何啟明引用新亞校歌：「趁青春，結隊向前行」之時，林卓廷會企開啲，維持社交距離啩？曾國衞局長就會同何啟明結隊嘞，希望佢兩位師兄弟能明白校歌第五第六句：「人之尊，心之靈。」
港版國安法係神主牌，用嚟嚇人，細緻嘅政府人事就係深耕細種之組織工作，中共有中央組織部，對安排黨內人事升遷有極深厚經驗，相信已有黨支部在中聯辦向特區政府訓令（如公安部長趙克志話，對香港警察給予指導），逐步委任民建聯工聯會成員入政府，由政治助理、副局長做起，當初曾蔭權年代委任不同才俊如莫宜端、陳智遠，邱誠武等人做政助、副局長，已成絕響。大學畢業生此後無謂考AO嘞，等同班嘅一級榮譽生去考AO，自己就加入工聯會民建聯接受政治培訓競選區議員，十年八年後有機會做副局長，對考到AO而自覺威威嘅同學發號施令，你話幾爽呢！如何啟明葉俊廉情況，勢必成為常態，2027年之特區政府問責班子，必然以根正苗紅人物為骨幹，吳秋北有背後影響力，到時引用國安法嚟鎮壓文人，定必合乎夏寶龍、趙克志之心意。