2020年過咗一半，警察濫捕從來冇停過，好多市民喺商場唱吓歌，轉頭就被捕被控。相信有留意法庭新聞嘅讀者都知，好多案件已經開始審訊，甚至已經判刑，手足律師費同在囚支援都迫在眉睫，亦因為開支越嚟越大，早排民間設立協助抗爭者嘅「612人道支援基金」喺5月初宣佈告急，因為可能用嘅基金，由成立之初有逾億捐款，跌到不足2,400萬元，呼籲市民捐款支持。不過基金噚日宣佈，短短20日就再收到2,400萬元捐款！
基金信託人大律師吳靄儀噚日喺《明報》專欄透露，經基金呼籲後，20日內籌到2,400萬元，即係每日平均收到120萬元，一共19,500人次，即係平均每個人捐1,230蚊。
吳靄儀：香港人真棒
香港人一呼萬應，向基金伸出援手，吳靄儀話記得早前有市民鼓勵佢哋，要用錢就用，唔夠錢會再捐，但佢估唔到𠵱家時勢艱難，「香港人仍一往無悔。我城應以擁有這麼堅定的守護者為榮」，佢仲大讚「香港人真棒！」根據基金上個月發表嘅財務簡報，成立至今基金共籌得超過1.1億捐款，已用7,800萬，截至4月30日基金向12,356人次提供支援，包括醫療費用、情緒支援費用、緊急經濟援助、法律費用、借出保釋金及還柙者物資費用等。