美國明尼阿波里斯一名黑人男子弗洛伊德（George Floyd），早前俾一個白人警員跪頸導致窒息死亡，事件導致全美觸發反警暴示威潮同衝突。浪潮亦捲至體壇，唔少運動員都紛紛公開發聲，效力法甲巴黎聖日耳門嘅法國籍黑人球星基利安麥巴比亦都喺twitter上發帖，希望公義得到彰顯。
麥巴比上周六喺twitter發帖，用咗個人像發聲同拳頭嘅表情符號，寫上「#JusticeForGeorge」，表示要為遇害黑人弗洛伊德爭取公義，短短一日就有超過四百萬人讚好。除咗麥巴比，球壇亦有唔少人力撐弗洛伊德，喺上周六德甲史浩克04主場0:1不敵雲達不來梅嘅賽事中，史浩克嘅21歲美國中場韋斯頓麥堅尼全程比賽就帶起「Justice For George」嘅臂章參戰，為弗洛伊德發聲。
J布朗揸車15小時參與示威
弗洛伊德被白警跪頸致死嘅事件喺美國當地繼續升溫，全美幾十個城市都出現反警暴示威，唔少NBA球隊好似湖人、勇士同拓荒者等都有發聲明，譴責種族歧視同暴力。喺NBA打咗14年嘅名宿史堤芬積遜（Stephen Jackson），都參與咗明尼阿波里斯舉行嘅示威活動，史堤芬積遜同弗洛伊德一齊玩大，仲以孖生大佬稱呼弗洛伊德，佢直指今次係警員對黑人嘅謀殺。
塞爾特人球星J布朗（Jaylen Brown）亦係為事件發聲最多嘅球員之一，佢仲透露自己特登由波士頓揸15個鐘頭車去亞特蘭大參與和平示威，佢仲話：「作為NBA球員，我冇辦法唔出聲，我都係黑人，我要為唔公平嘅現象發聲。」不過，亞特蘭大當地部份暴力示威，令亞特蘭大大學嘅名人堂都不幸受牽連被破壞。至於爵士後衞卡拉臣（Jordan Clarkson）及自由身球員JR史密夫（JR Smith），也有在上周六於洛杉磯參加示威。
歌芙拍片：「我會係下一個嗎？」
同樣喺美國受到打壓嘅女足，唔少球星好似娜賓露、雅歷絲摩根等人，都有喺社交平台發帖聲援遇害黑人，而女網球手歌芙亦都喺社交平台發佈影片，佢列咗多個曾遇害嘅黑人圖片後，表示：「我，會係下一個嗎？」呼籲更多人用自己嘅聲音向種族歧視說不。