港版國安法勢在必行，阿爺吹大雞，親共組織都要「數人頭」充數表態。內地媒體日前刊登逾2,000人聯署聲明支持國安法，唔少名字耳熟能詳，例如同PK鄧一齊飯聚嘅明星足球隊成員成龍、曾志偉、譚詠麟。唔少網民見到名單有「蔣志光」都大表錯愕，唔通昔日唱過《皇后大道東》、支持過八九民運嘅佢，今日敵不過投共嘅命運？
蔣志光噚日喺個人facebook澄清，佢冇簽署過國安法聲明，支持參加聯署嘅「蔣志光」，相信係另有其人。除咗蔣志光，另一位喺名單上嘅台灣藝人「徐熙媛」，亦透過經理人澄清大S冇收過聯署通知，相信只係同名同姓。
連登仔速製演藝界制裁名單
世事有冇咁多巧合？八方抱住求真精神睇晒呢份藝人名單，發現騙徒手法真係層出不窮。唔少政界人物都變咗「藝人」，分別有譚耀宗、侯志強、陸頌雄、陳勇、曹宏威同范國威。眼利嘅網民仲發現，粵劇界有位「陳汝騫」舊年已經過咗身，都居然「被聯署」；「肥媽」同「Maria Cordero」就被當成兩個人，成功擦到多一個名喇。Pazu薯伯伯fb專頁仲發現，份聯署入面有一個叫「鍾逸傑」，佢話唔知係咪真係有個藝人同前布政司鍾逸傑爵士同名同姓？定係兩年前過身嘅鍾爵士報夢簽咗聯署？
網民除咗喺份名單搵錯處，有連登仔將聯署相片化為文字，成功完成一張演藝界制裁名單，預備同美國分享，部份聯署者似乎都有美國護照，八方食住花生等睇有邊啲藝人彈出嚟話自己冇簽過。
李八方