【港情講趣】
隨着港漫由高峯時期每周出幾十本，到近年只剩幾本周刊；再隨着2335期經歷廿八載的三日刊《古惑仔》都結局，《新著龍虎門》又易手，近年甚少聽到「港漫狂迷」這個名詞，未來甚至也沒太多機會聽到。不過，可以稱得上狂迷，當然會撐到底，朱崇熹（Kent）現在仍每周準時買港漫送飯送早餐，每月用過萬蚊租倉放大量珍藏……咁貴？「過千呎喎。」不如去倉影相訪問？「太爆太亂喇。」咁多？對，多年來他連作者舉行活動時用過的易拉架都儲，單是易拉架都超過150個。
其實Kent的珍藏已經慢慢北移到大陸老家，早前他就把超過150個易拉架逐少逐少運上大陸，而且逐一拉起拍照記錄，最後來一個大晒冷，進行一個無人參觀的「漫畫易拉架」展覽，純粹為拍照留念，「今次收埋喺大陸之後，都應該冇乜機會拎返出嚟，所以要留個紀念。」
易拉架照儲 萬三蚊動漫節掃貨
易拉架都儲？「只要係儲開嘅，都會盡力收藏，易拉架只不過係其中一項收藏品。記得收藏第一個易拉架，應該係2003年，當時係《神兵玄奇》Card Game寰宇最強首屆高手邀請賽，喺會場作宣傳之用。」假如你是港漫迷，應該記得這些易拉架曾經有得賣。「最初易拉架只係宣傳品，不過玉皇朝就首創漫畫易拉架預訂售賣，喺2005年第七屆香港漫畫節，以『Jumbo拉架直立式海報』之名發售，有26款。」當年Kent買齊26款，每個賣$500，即是只買易拉架都花了$13,000。「之後2006年第八屆動漫節，都有10款《新著龍虎門》易拉架預訂，叫『龍虎門1:1列強海報』，平一半更大眾化。每個$250，而且只有10款。」之後都是一些簽名會或活動後，Kent從漫畫家、漫畫公司手上買回來的。
說到最喜歡的收藏，除了龍虎三皇，「《邊荒傳說》啦，因為有已故作家黃易先生親筆簽名；之後龍虎三皇就係嚟自《新著龍虎門》史上首個答問大會。」
儲到一個點，知道在香港不停租倉越租越大不是辦法，「作為漫畫儲物狂，租倉都放到就快冇位。所以先將一啲額外買多過一件嘅漫畫珍藏、日系、美系收藏逐步搬返大陸老家，陸續將全部收藏北移。」珍藏離鄉別井，事先都會合照留念。
訪問前問過，到訪問時再追問過幾次，Kent都答不出自己有多少港漫珍藏，只說：「多到唔敢想像。」數以千計？Kent擰擰頭，數以萬計？他苦笑，數以十萬計？這次笑而不語，可能是他本身也數不清，只知道《龍虎門》收藏品比黃玉郎還要多，會否怕老婆鬧？「唔會，佢都儲好多嘢。」總之，Kent的瘋狂程度可從歷史中找到頭緒，由漫畫公司仍雄霸書展時期開始，到之後的動漫節，一次可以花多少錢？「起碼六位數字。」但也不是無差別狂買，主攻玉皇朝，因為最喜歡黃玉郎，而且「一個人排，排得玉皇朝排唔到天下。」
大肚老婆齊排隊 黃玉郎呵護備至
其實也不只一個人，仲有佢老婆。因為問到偶像黃玉郎何時開始認得Kent時，他說：「記得有一年動漫節，老婆和我一齊排隊買嘢，當時老婆大緊肚，咁啱黃生經過見到，即刻叫咗我哋過去，再叫職員畀張凳我老婆坐，應該係嗰次之後，就認得我哋。」真的很偉大，我說的是Kent的太太。再之後也不只兩個人了，「有時漫畫公司舉行遊戲活動送獎品，我仲會叫埋仔女一齊去上台玩，多個機會贏嘛。」
每逢漫畫家有簽名會等活動都會到場，簽名之餘有時也叫漫畫家題字畫畫，「有一次黃玉郎在尖沙嘴舉行簽名活動，很多人排隊，輪到我時我請黃生簽名之餘畫幅畫，他說：『咁多人排緊隊，冇時間畫喎，下一次啦。』我知道他下一個簽名會在台灣搞，於是就買機票去台北三日兩夜，『嗱，你話下一次呀！』」最後黃生就替Kent畫了一幅主角畫。就是這樣，Kent和很多漫畫家由偶像fans關係，發展到現在的朋友關係，「好多時會約食飯敍吓。」看他facebook不時出飯敍合照，就知有幾多漫畫家朋友。當中包括邱福龍，他更是邱福龍漫畫公司漫畫迷會Dark Club的會長。「之前成日踩上門搵龍少簽名，已經混熟咗一段時間，到2012年，佢話想搞讀者會，最初只係諗住參與吓，點知最後被點名做會長，由設計到幫手印會員卡、會員贈品，搞活動都要做。邱福龍只有一個要求，就是不賺錢，只為凝聚讀者fans，佢話：『輸場波都喺度啦。』」Kent說初期有超過500會員，現在也有300多個，「每年會員卡用兩個字母，由A開始，我諗住去到Z就唔做會長喇，而家做咗八年，即係做多五年。」
出親筆畫板集 死先送畀人
Kent的收藏有漫畫、周邊產品、金牌、複製原畫、原稿、簽名板及親筆畫板，早年就因為想留個紀念出一本紀念本，集合親筆畫板，更找來不少漫畫家繪畫「龍虎三皇」，包括牛佬、許景琛、劉雲傑等，不過因版權問題不作發售，「印咗500本，送返畀有份畫嘅漫畫家同朋友，有啲就收藏。曾經有人喺facebook問我可唔可以送本畀佢，我話：『如果你長命過我，我死咗之後可以嚟攞。』其實，當時係因為怕麻煩所以先咁講，不過既然已講出口，會兌現承諾。」
Kent自小學到現在成為兩子一女之父，一直撐，回到從前，說說港漫狂迷的起源。「記得當年小學有一次，細佬去同學屋企玩，媽媽要我陪埋佢去，咁我唔熟佢啲同學，就獨坐一角百無聊賴下發現一大叠公仔書，隨手抽一本來看，就是《龍虎門》，記得係大約400期左右。」網上找資料，386期在1983年1月1日出版，即37年前，一本《龍虎門》賣$3。「當時見到封面啲人着古裝，故事講緊白蓮教又聖上又宮殿又御林軍，以為故事係古代啦，點知睇睇吓，突然有一格有直升機喎！先知道原來係現代，只係白蓮教教主東方無敵發皇帝夢。之後就自己每期喺報紙檔買《龍虎門》，亦都追回之前嘅期數。當年冇得上網搵，自己喺二手書店搵，都好困難嘅。」
惋惜《新著龍虎門》易手 撐到最後
之後經歷港漫盛世兵器潮，6吋又有12吋又有，買又有隨書送又有，Kent竟然差不多儲齊，「基本上所有24吋以下港漫兵器都儲齊，而且唔係每款儲齊，係每款兵器嘅所有版本，即係海外版、特別版都買晒。」當時一本漫畫同一期可能都要買十本八本，有時為儲印花換禮物更加買幾十本！「咁瘋狂或多或少可能因為我家族生意係生產不銹鋼廚刀啦，明白到由平面設計而衍生成為立體，當中唔係咁簡單。」見證港漫不同年代，Kent說現在最想出一本《龍虎門》百科全書，將自己的收藏一一記錄，「不過真係超大工程，要好多時間。」
雖然有愛，但都要面對現實，港漫越來越少，港漫迷這生物亦越來越珍貴，「傳統港漫就好似菲林咁，係夕陽工業，除咗數碼化外，手機又有好多其他娛樂。不過我都會盡力支持到最後。」提到《新著龍虎門》易手，黃玉郎剛出新書《龍虎5世3世仇》，Kent表示覺得可惜，但一樣用力支持，書中更有他的專欄「朱場Fun」。
陪阿爸阿媽去飲茶到酒樓門口書報攤買本「公仔書」看，再之後每周總有幾日放工買本港漫送飯的日子，已經成為很多人的回憶，這份情懷，又令幾多人會逢星期四到書報攤買本《龍虎5世3世仇》，逢周五買本《山海逆戰》，再期待牛佬新書？
採訪：陳孝義
攝影：蕭志南