【兄弟爬山】
【本報訊】五年前我們唱着《今天我》、《一起的撐》，到現時港人在商場一呼百應的《我願榮光歸香港》，抗爭永遠與音樂扣連。在兩大「國惡法」將至的時刻，仍有港人發動眾籌10萬元，組團出版《香港抗爭音樂誌》，訪問多位在亂世中仍勇敢高歌的唱作單位，包括黃耀明、樂隊野佬、鍾一諾等，並以插畫記載過去一年香港的抗爭大小事，當中亦會列出抗爭期間音樂作品的出版日期和內容，以音樂為時代做見證，以音樂捍衞出版自由。
記者；盧珮瑤
音樂網站「3C音樂」發起《F For：香港抗爭音樂誌》計劃，並於網上招募了18位成員組成「F For團隊」，希望眾籌10萬元出版雜誌，用音樂呈現過去一年的抗爭。雜誌共分三冊，第一冊將6至8月面世，每本售價120元，先記載去年6至7月的事件；第二冊望於年底面世，第三冊則在來年夏季出版。
18名成員中，本報找來其中三位，談音樂談理念也談恐懼。訪問那天，港版國安法已來勢洶洶，記者於是劈頭問他們同一個問題：「其實驚唔驚本書出唔到？」
黃耀明受訪 爭取終極勝利
「本書出唔出到？其實我驚籌唔到錢多過被禁。」雷米諾本身非常淡定，不過在計劃中他卻戰戰兢兢。他原是設計師，在計劃中要化身記者，由揸畫筆變揸筆，訪問的更是黃耀明，「我上次訪問人係中學年代喇！」雷米諾展示一叠合共5,000多字的初稿，上面滿佈友人改稿的筆迹，他笑言內容豐富得想把兩小時訪談都寫入稿中。
「佢（黃耀明）有啲說話，我喺訪問都有寫，我係好驚訝佢會講呢啲嘢。」雷米諾與明哥由達明一派談到香港的轉變，但為他帶來反思的，是明哥的「愛國論」，「有好多人覺得明哥呢個年紀都係好『大中華』，但佢講得好清楚，『當一個國家都唔要我，我係咪愛國其實有咩意義？』。」在雜誌中，黃耀明的章節以「無終極勝利，為終極失敗」為題，亦是明哥對抗爭運作的警示，「可能光復香港之後，喺一個民主政府下，我哋都係要繼續留意呢啲不民主、好威權專制嘅事。」
「暫時都唔驚嘅，國安法呢件事都好多人出嚟發聲，我希望佢係朝好嘅方向發展。」雜誌封面左上角寫着《F For》，中間以多個港人熟知的抗爭標誌構成一個圓形圖案，包括「光復香港」旗幟、PePe公仔、元朗警署等，全都出自設計師阿Kit手筆。
「成場運動都有好多嘢係F字頭，Five Demands（五大訴求）呀、Free Hong Kong呀、Freedom（自由）呀、F**k the PoPo呀……」書名留下大片空白，是他希望讓讀者反思運動中對自身最重要的意義。封面設計上，阿Kit以拼貼風格代替一張張新聞圖片，希望創出一種較新鮮的風格，「書入面都好少用新聞圖片，全部都係由插畫師將抗爭畫面畫返出嚟，可以畀大家睇到由藝術家角色睇嘅抗爭係點樣」。
反送中運動爆發以來，陸續有作品以插畫、攝影集結成書，惟缺音樂，「呢個project好專注音樂同運動之間嘅關係，終於有人填補到呢個空缺，我覺得幫到手嘅話都好榮幸」。
無懼國安法 捍衞出版自由
本地男子音樂組合「鍾氏兄弟」，屬其中一隊2010年代「本土音樂」的標誌，不時推出緊扣時代脈搏的歌曲。莫問負責訪問的鍾氏兄弟的鍾一諾，讚賞對方為人夠冷靜，「佢好緊張fact check，佢教識咗我上網睇到張相，人哋可以看圖作文，要先諗下係咪任何角度都會影到一樣嘅相先至好撳share（分享按鈕）」，笑言訪問時猶如上課。
會否擔心雜誌未能出版，莫問堅定地說：「出版唔一定係紙本，總之係知識傳遞就係出版。」她曾在抗爭運動初期患上輕微抑鬱，「以前我乜都唔想理，我匿埋就得，咩人都唔想見，見到啲post（發文）都當見唔到」。結果，拯救她的、拯救香港的，都是一場又一場的抗爭，「見到咁多小朋友為香港犧牲，你做大人無可能無動於衷」。惡法將至，出版和音樂還有用嗎？「做到就做……人哋《頭條新聞》都可以一夜消失，我呢啲出少少力算係咩？」
後 記
訪問刊登之時，港版國安法草案已經通過，國歌法亦勢不可擋，事態並沒有如阿Kit所言「向好方向發展」。不過，當記者問對他而言，書名的「F」是代表甚麼，他毫不猶豫地回答「Freedom（自由）」，「我哋一直以嚟做嘅嘢，都係為追求自由。」趁我們還有聽音樂的自由。趁我們還有出版自由。
眾籌連結： https://www.kickstarter.com/projects/846553230/f-for-hong-kong-protest-music-zine-f-for/pledge/new?clicked_reward=false