英超重開再有新進展，英媒話各隊今個禮拜會繼續開會，即將會落實復賽日期，原定6月12日重開嘅英超，好可能延期至6月19日先正式復賽，頭炮仲係熱刺主場鬥曼聯嘅Big 6大戰。而初步建議周五同周一晚各有一場比賽，剩低八場會安排喺周六、周日唔同時段踢，確保餓波嘅球迷每輪都可以睇足10場英超，不過有關建議仲有待落實。
作為全球搵錢最多嘅曼聯，雖然武漢肺炎疫情令佢哋收入大減，不過佢哋都願意同細球會同舟共濟。事關英國傳媒爆料，曼聯小將卡斯度彭利拿、基蘭奧哈拉同艾芬咸美頓，今季分別外借到蘇超嘅赫斯、英甲嘅伯頓同保頓，紅魔鬼嘅最新決定，係唔會收取3名借將一共13萬鎊（120萬港元）嘅租借費，減輕三間細會嘅財政負擔。
不過另外九名大牌啲嘅球員，包括借咗去羅馬嘅基斯史摩寧、國際米蘭嘅阿歷斯山齊士、錫菲聯嘅甸恩軒達臣等，曼聯就冇相關嘅免收安排喇。不過曼聯都算好好人㗎，事關佢哋同錫菲聯爭緊前四，原本喺六月就可以將門將甸恩軒達臣收回己用，不過曼聯都好大方，願意繼續將呢位新星借畀競爭對手，希望曼聯唔會後悔喇！