唔少官員呢排被問到港版國安法有乜踩界位，都會推稱未有草案內容，好難評論，但未有草案內容下，又會個個話普羅市民「冇事㗎、放心啦」，其實係咪變相確認，呢條惡法根本係人治非法治？
就喺大家對港版國安法疑慮多多之時，好多建制重量級人馬紛紛現身派定心丸。因為23條立法而腳痛下台嘅前特首、全國政協副主席董建華前日登場，同傳媒老總閉門茶敍又公開發言，聲稱港版國安法只係針對極少數犯下嚴重罪行者，叫香港人放心，說服力近乎零。
講多錯多急刪文
據聞另一個左派法律界女「紅」人同傳媒見面講述對國安法嘅「精闢見解」時，曾經提到劉曉波個案喺港版國安法下適用香港。劉曉波喎，即係因為起草《零八憲章》要求「結束一黨專政」而被控以「煽動顛覆國家政權罪」入獄嘅內地異見人士。嘩，如果劉曉波個案適用香港，咁唔少香港人要洗定籮柚啦！之不過呢位女紅人，據知後來又話講錯要收返，亦話唔好寫。到底「講錯」定「講多」？相信普羅市民，心中有數。