問香港人呢刻最需要乜？應該數十樣都未論到「口罩」，因為疫情減退只係得返零星個案，大熱天時都幾想除口罩透透氣。偏偏林鄭就係呢個時候寫網誌話下個月會向市民派發即棄口罩，仲話疫情可能會維持一段時間，市民喺唔同場合都要繼續戴口罩，會為有需要學生、院舍護理人員、前線清潔工友、長者同弱勢社群提供口罩喎。
市民苦笑：快過一萬蚊到手
如果坐時光機返去2月，香港人通宵撲口罩嗰時林鄭咁樣公佈都會贏到兩下掌聲嘅，不過一切都冇如果，最缺口罩嘅日子，香港人只可以自救，羡慕澳門政府全民派罩。林鄭今次派口罩，坊間苦笑應該快過一萬蚊到手，不過上次派口罩鬧出黑箱作業、假專利、發霉等醜聞，今次派即棄口罩又唔知搞出咩笑話。
有人講笑話政府近排扣押咗眾志一批口罩，梗係貨源充足啦。八方就想知環境局局長黃錦星有咩心情，皆因佢幾日前先喺立法會話港人每日用400至600萬個口罩，希望重用口罩可以減少即棄口罩使用量。政策朝令夕改，睇嚟連「大嘥鬼」都跟唔上。