踏入千禧年代，香港戲院式微，由1993年119間跌到2019年只有57間；隨住去年底旺角豪華戲院落幕，單幢式大型戲院已無一倖存，消失的戲院，也許只能透過電視電影再三回味。藍田長大的敖嘉年，小時候最愛跟朋友仔到戲院流連，昔日新蒲崗麗宮、觀塘寶聲和銀都、秀茂坪的金茂坪及藍田的金城戲院，都滿載敖嘉年的童年回憶。
採訪：戴彩煥
敖嘉年日前跟《蘋果》記者重遊舊地，細數他那些年的戲院回憶。位於新蒲崗的麗宮戲院於1966年開幕，憑3,000座位成全港最大戲院，「我哋細個成日嚟呢度睇戲，睇一啲四、五輪嘅戲，票價就比較平少少，當時有超等、後座、中座、前座，我哋通常會買中座後小小，首先個價錢平少少之外，因為上層有個超等，佢哋成日上邊丟垃圾落嚟，所以我哋會坐後小小，啱啱遮到，嗰時成班𡃁仔搭巴士嚟睇戲，好開心。」
懷念門口攤檔
觀塘市中心因為重建，早已變得面目全非，但敖嘉年仍清楚記得僅一街之隔的寶聲戲院和銀都戲院，「寶聲我哋細細個睇戲睇到大，我第一次睇戲，係爸爸帶我去銀都戲院睇《八墓村》，驚慄電影，睇完好驚，搭巴士都好驚。」銀都戲院門口擺賣的小販檔，曾幾何時是觀塘街坊的「米芝蓮」，藍田友敖嘉年也經常幫襯，「因為行人路特別闊，門口就好多小販攤檔，賣煨魷魚，一架木頭車賣嘉應子嗰啲口立濕嘢、生菜魚肉、碗仔翅、滷味。」啟田大廈商場前身是金城戲院，在敖嘉年成長中扮演重要角色，當年踢住拖鞋跟朋友仔在金城睇許冠傑主演的賀歲片《最佳拍檔》，最令他深刻難忘。還有位於秀茂坪曉光街空置近30年的金茂坪戲院，敖嘉年表現得極度興奮，「呢度對於我嚟講好特別，係傳聞中其中一間最猛（鬼）嘅戲院，我哋細個聽聞廁所係最猛，所以我哋成班𡃁仔嚟睇戲時，會特登去廁所探險。」
一蚊任睇好平
問到可有睇過鹹片？敖嘉年坦然承認，問在那間戲院看？他說：「喺荔園，嗰時幾個𡃁仔去荔園玩，入邊有間戲院，咁就好平，我唔記得係一蚊定幾多，你可以任睇，我哋好早入去玩，冇乜人，玩機動遊戲又玩鬼屋，畀一蚊入去睇，咦？姐姐除衫嘅？咦？除晒嘅？當時唔係三點盡露，淨係上胸，任你睇。」
當年大戲院，敵不過時代變遷，變成一系列迷你戲院，昔日過千人一起在同一空間睇一齣好戲，相識的、不相識的一起哈哈大笑，今時今日竟變得遙不可及。對此敖嘉年說：「𠵱家一間戲院有多啲唔同選擇，有好有唔好。我覺得去戲院睇戲係另一樣感受，銀幕大好多，就算迷你戲院都大過我屋企個銀幕，所以希望疫情過後可以百花齊放。」