講戲院，當中難忘是電影廣告，現年70歲的鄭偉強（阿鄭）1965年入行做戲院美術廣告，即行內人所稱的「寫畫佬」，作品曾高掛皇都戲院，畫電影廣告畫畫足二十多年的他，80年代尾仍有為德寶院線做戲院廣告，1990年退出，見證香港戲院行業最輝煌年代。
阿鄭道：「海報有兩個做法，一種係電影公司搵設計師設計海報，佢哋設計咗海報之後，放大咗掛外牆就係我哋做。掛上去係判畀人做，一種係搽漿糊外牆，黐上去，一種係用竹棚或者鐵架，一塊塊掛上去，嗰啲叫戲院廣告大牌；一般戲院都有鐵架，但如果臨時要加大宣傳，個鐵架唔足以負荷，就另外加竹棚擴大啲，我記得做李翰祥套《西施》，成個倫敦戲院由頭到轉彎搭晒竹棚，做晒啲戰車馬車，連埋大堂啲柱都做埋decoration，戰車同馬車都係半立體。」阿鄭說，一般掛戲院外牆的廣告畫，由多幅4乘6呎畫組成，最少12幅，最多去到60幅，多久才完成最大60幅戲院廣告畫？他說：「三日，因為唔係一個人，我哋有畫畫、寫字、油色，大概3至4個人做，我就乜都做過。《時光倒流70年》做成大半年，真係唔返工都有糧出，但如果畫期短唔收得，馬上即刻抽調返工，通宵都要做。」
談到寫畫佬生涯中，怎少得畫三級片時，阿鄭說：「有！大華戲院我畫過《十命奇冤》，日本恐怖片，我喺外牆紮咗個公仔，20呎高，啲頭髮我搵黑冷嚟做，掛咗之後我畀人拉去差館，對面有間酒店對到正一正，𠵱家永安百貨公司個位，嗰間酒店報警，拉咗我去油麻地差館，話太恐怖，要拆落嚟，經過嗰次之後，香港影視處嗰啲廣告都要censor。」
採訪：戴彩煥