如果要票選噚日內會最勇武議員，大家可能覺得係衝到主席台前抗爭被逐嘅一眾民主派，藍絲就梗係一注獨贏肯受命梁君彥監粗嚟主持內會選舉兼完成選出李慧琼做主席任務嘅陳健波，但八方相信唔少網民另類之選會係熱血公民鄭松泰。泰博做咗乜？冇，就係因為乜都冇做過，着住黃褸嘅佢一直坐喺位，連登都有人開PO佢係咪用緊念力制敵？泰博就喺fb回應：「做自己嘢。」真係有禪味。
直至傍晚泰博喺fb發帖，話有記者問佢點解無出去，佢就「直白」回答，「如果大眾期望我在議會內打交，當初就唔會放棄我們的陣營，只選擇我一個進議會。今屆任期，我會專心做好份內事。多謝。」並補充耳熟能詳嘅一句：「大家要不分化。
事實上唔少民主派令人刮目相看，例如喺前台抗議嘅民主黨黃碧雲，見佢着咗運動裝，明顯預咗唔錫身作戰，公民黨楊岳橋亦同工聯會陸頌雄對罵，一句工聯會係「暴動之父」，展現罕有火辣一面。
陳健波就完全不負「打茅波」之名，叫莫乃光唔好做直播及錄影，否則趕離會議廳，但唔少建制派公然拎手機做直播，佢哋又可安坐席上投票選李慧琼做主席喎。打茅波之名，你估浪得虛名？