早排網上流傳一段片，有老師介紹鴉片戰爭時候話英國係為咗喺中國禁煙而出兵打中國，呢單嘢即時俾建制大做文章，話有教師專業失德喎、又話愛國教育唔夠。建制派班立會議員梗食住上，工聯會「醬爆」陸頌雄把握呢個機會獻媚，噚日出席立法會工務小組時供獻絕世屎橋，話要起個林則徐紀念公園，但結果俾公民黨飛機師譚文豪一句KO，搞到威就拎唔到，仲要變相公開落班POPO面，POPO應該多得佢唔少。
醬爆：要用正邪角度教歷史
噚日會議審議科學館同歷史博物館嘅擴建工程，醬爆懶醒咁借啲意批評有教師扭曲鴉片戰爭歷史，將英國人販賣鴉片改成幫中國人戒煙，所以建議歷史博物館擴建後，要就鴉片戰爭「從正義同邪惡嘅角度」加強教育史實，仲話要喺附近加建林則徐紀念公園，以紀念林則徐對抗殖民主義同係反吸毒民族英雄，教育下香港市民。
一般市民對林則徐反吸毒就應該冇咩大感覺，但就一定會覺得今日最需要反吸毒訊息嘅應該係香港POPO，於是機師豪就食住上，提出咗個別開生面嘅反建議，就係將林則徐相片擺去各區警署高高掛，等班POPO引以為戒，令佢哋知道販毒原來係唔啱囉。呢個建議一舉兩得，醬爆你冇理由唔支持啩！
李八方