教育局前局長吳克儉在任時「唔得掂」，但離開官場後情場得意。八方收到風，妻子梁允愛喺2016年病逝嘅吳得掂，今個月4號喺沙田婚姻登記處入紙申請再婚，對象係新界校長會副主席、田景邨浸信會呂郭碧鳳幼稚園校長陳孟宜。
與幼園校長共諧連理
今年68歲嘅吳得掂政績差劣，「代表作」之一包括2015年11月缺席TSA公聽會，由當時嘅副局長楊潤雄頂上，事後被傳媒揭發原來請咗假陪老婆去日本睇紅葉。吳得掂妻子、做中學副校長嘅梁允愛之後癌症復發，2016年6月病逝，當時吳克儉曾經喺facebook許諾「永遠愛您」，不過呢位深情嘅前局長，似乎好快就搵到「第二春」。有傳媒搵到吳得掂，恭喜佢之餘，問佢會唔會擺酒同請前官場同僚飲，佢話未諗到呢啲，又話唔想講咁多，想盡量低調。
佢嘅對象就係幼稚園校長、58歲嘅陳孟宜，陳校長喺新界校長會活躍多年，早喺吳得掂做局長嘅年代就有交流，喺「香港升學教育中心」2015年底一場活動上面，兩個人已經同場影過合照。八方睇返陳校長幾年前接受傳媒訪問，原來佢讀設計出身，畢業後第一份工係櫥窗設計，因為身體唔好轉行做幼稚園，佢仲透露爸爸係一個突發記者，父女少見面，但爸爸每次返屋企都會分享採訪經歷，所以大個之後比一般人大膽。
翻查吳嘅facebook可見，吳得掂2017年4月仲在任教育局局長時，都出席過浸信會呂郭碧鳳幼稚園舉辦嘅親子體驗營，當時已經有同陳孟宜合照，唔知嗰時係咪已經互生情愫？
李八方