家陣部署緊重開嘅意甲，各球會都開始幫職球員進行病毒檢測，只不過檢測結果一出，森多利亞同費倫天拿仍然係重災區，加埋有10位職球員確診，就連AC米蘭都有人被驗出對武漢肺炎病毒呈陽性反應，睇怕意甲要重開都幾難。武肺喺意大利爆發初期，森多利亞已有加比亞甸尼同艾卡度等七人確診，雖然已經康復，但喺啱啱完成嘅檢測入面，又再有三人中招，仲有一宗係「復陽」個案，只不過球隊今次就冇公佈染病球員嘅名。另一支意甲球隊費倫天拿，喺周四亦都宣佈新增六宗感染個案，當中有三位係球員，但將感染人士隔離後繼續操。加上最新消息話AC米蘭都有三人中招，所以意甲重開都仲係觀望中，布雷西亞隊長加斯達迪路就話，全隊都唔贊成復賽，驚操練或比賽開番只會增加感染機會。
同樣計劃緊重開嘅西甲就好彩好多，至少班霸巴塞隆拿宣佈，隊內所有球員都通過病毒檢測可以準備開操。至於雷加利斯教練艾古爾就突然爆料，話西甲賽會向自己透露聯賽會6月20號重開，喺7月26號完成球季，雖然賽會就未有直認會喺邊日復賽，但就提到會爭取六月重新開季。