最近有黃絲朋友問：「馮翁，我知你深深藍，但都想了解下你點睇『攬炒』，覺唔覺得咁做好naive？」
我答：「『攬炒』本身係咪naive，同講『攬炒』嘅人係咪naive，其實係兩件事，千祈唔好混為一談。成熟嘅攬炒者應該思考兩個問題。一、『攬炒』具體指乜？比如話，中聯辦將黃色經濟圈形容為『政治綁架經濟嘅政治攬炒』，呢個就係好naive嘅講法，因為咁樣唔係『攬炒』，係『藍炒』，藍色經濟圈畀人炒，黃絲仲有商機添。兩敗俱傷甚至兩敗俱死，先係『攬炒』。
「你可能問，『死咗，然後又點呢？』死咗咪死咗囉，有乜然後又點啫？法治都死咗無限次啦。當然，如果你有宗教信仰，可以試着跟自己說，『死咗，然後就盡快投胎』，『死咗，然後就往生極樂』。但首先，你一定要接受死，唔好幻想奇蹟。其次，諗清楚『攬炒』具體係乜。如果你唔接受，或冇思考過最壞情況，咁我會認為你係naive，或根本唔同意『攬炒』。
「第二個思考嘅問題，係點樣做到『攬炒』？舉個成功例子你聽，主角係我國偉大兵法家吳起。吳子兵法講過：有個犯咗死刑嘅人瞓喺地下，追佢嘅官兵就算成千人，都會淆底，唔敢隨便走埋去，點解？驚佢忽然跳起身，唔要命咁襲擊你吖嘛，呢啲叫『一人投命，足懼千夫』，所以吳起可以用5萬死士，打敗秦國50萬大軍。不過呢場仗只係說明『唔怕死』有時可以反敗為勝，以弱制強，但呢啲唔係攬炒。
「真正嘅攬炒發生喺吳起身上。根據《史記》同《呂氏春秋》，楚悼王時代，吳起當權，搞政改，激嬲晒楚國貴族。悼王一死，貴族就聯手喺喪禮度要隊冧吳起。吳起見弓箭手包圍，退無可退，就好悲壯咁大叫：『我依家就畀你班仆街見識下我嘅兵法！』一叫完，佢就撲過去楚悼王條屍度，啲箭手諗都唔諗，就亂箭射Q死佢，連楚王條屍都中箭。但根據楚國法律，兵傷楚王遺體係死罪，所以太子一即位，就依法逮捕嗰班貴族，七十幾家要滅門。
「香港有冇吳起，我唔敢講。但我肯定，只要香港人心目中嘅『黑暴』主謀同『恐怖分子』伏法，就唔會有人想攬炒。攬炒嘅責任，絕對喺政府身上。」