人稱「長洲覆核王」嘅郭卓堅（圖），大大話話都入稟告過政府不下30次。堅叔見到不公義，搭車又搭船咁係長洲出嚟金鐘高等法院申請司法覆核。唔知係咪打得官司多，爭落一大筆訟費，律政司前日申請堅叔破產。啱啱過咗80歲生日嘅堅叔，話「一早預咗喇」，仲話破產都唔會阻止佢繼續申請司法覆核喎。
八方噚日收到破產嘅消息，嗱嗱聲打畀堅叔關心吓，點知佢都看破紅塵，淡定過你同我，連自己爭幾多律師費都唔知，一時話幾百萬，一時又話千幾萬，真係好豁達。八方兩日前先係喺高院見過堅叔，佢話要司法覆核中聯辦大佬駱惠寧，雖然贏面好低，但儘管睇吓法庭點耍走堅叔。
堅叔話自己戶口得嗰幾千蚊，就算破產都冇有怕，不過到時可能每次申請司法覆核都要眾籌入稟費同埋車費。