小學雞點睇鴉片戰爭？中學生的歷史觀如何？祥哥的萬惡淫為首，從未聽過已笑到噴飯，Sam神的尖沙嘴Susie嗎？真係見過！尖沙嘴警署有最兇猛、專射盲右眼的惡狗，原來有英文名喎！
鴉片戰爭到底點睇呢，宅了兩個月長出蘑菇的機男反應好快咁問：隻嘢好冇玩？下架未？哎後生仔，鴉片戰爭，慘痛歷史啊，細佬，俾啲認真好嗎。後者唯有正經八百，反問鴉片是否港府宣傳叫人咪take那款？啪得丸多，就是東亞病夫臭名遠播的原因嗎？
專注歷史科，好不好？後生仔猶豫一下，追問當年清朝狂煲的鴉片煙，會不會是盜版呢，是以英國佬出兵，打擊A貨。侵權要賠償，賠到甩褲，鐵證如山，冇得抵賴。喔，如果這樣答作文考題，講明係科幻創作，唔知扣剩幾分。萬一後生仔質疑鴉片是由烏鴉實驗研究室洩漏引致病毒大爆發，比武肺早了180年，是為Covid-1840，會點？中招者遍佈中原領土，外國沒有感染個案，沒出現全球大流行。無可疑嗎？鴉片戰爭源頭虎門，689沒提出「虎門再出發」洗刷污名。年輕一輩憑常識確認，鴉片戰爭對日常之重要性，影響不如A片。在偷食榜中，包尾。