剛剛看完七十年代小眾經典動畫《野星球》，滿腦驅之不散的奇情科幻，影片裏遭未來世界巨人當作玩具的渺小人類，頸部被強硬套上行動遙控箍，要你行你就行，要你企你就企，不但失去自由，還被稱為動物，幾經艱苦才衝出五指山，外面的世界充滿豺狼虎豹。誰料這時電視新聞失驚無神出現一則報導，話有關當局正在積極練習警犬偵察武肺病毒，心靈脆弱的我當然無法保持鎮定，直頭以為漫畫大師Roland Topor的公仔入侵現實。原來專家研究出病患者汗中有異味，畫面只見一隻狼狗東聞聞西聞聞，企圖替先前植入鼻端的病氣對親家，旁白絕無惡搞性質，指天才神犬好使好用，畢業後出巡機場火車站，可在人群中搵出冇發燒冇咳嗽的帶菌者，有效遏止病毒傳播。
嘩厲害了我的狗，你話法國人抵唔抵錫，咁都畀佢諗得出，平日返工蛇吓蛇吓，淨掛住飲咖啡飲紅酒，估唔到個腦並未停止運作，不鳴則已一鳴驚人，秘密武器一出勁過占士邦。家居隔離下星期局部解封，預咗街上人山人海，正需要生力軍控制場面，狗隊傾巢而出，應該對付得到傳說中隨時打到嚟的第二波，人類最好的朋友實至名歸。所以我一直不贊成稱香港黑警為狗，四腳趴趴走的畜牲，情操比揮警棍周街亂打人的物體高尚多了，而且後生嗰陣在美國，警察代號公認係「豬」，根本拒絕改變習慣。唯一擔心的是，汗腺分泌的氣味不像海洛因可卡因穩定，主人午餐食多兩片洋葱飲多一罐可樂，都可能引致汗味突變，警犬不虞有詐，容乜易吠錯好人？