剛過去的五一黃金周、加上10個多月來逆權運動與武漢肺炎接連出現，讓香港市民清清楚楚這個政權有多荒謬，施政失誤、過度警暴、法治衰亡，也正因此為二次創作提供源源不絕的靈感，網絡這段時間湧現大量諷刺作品，如雨後春筍遍地開花。音樂人晴天林（Sunny）借二創歌曲唱出天天荒誕的香港世情，以歌聲撫平傷痕；插畫家咳神與謝曬皮亦不停將嬉笑怒罵的畫作放上社交媒體，一張插圖的文宣感染力，勝過千言萬語。
撰文：牢卉
【插畫篇】
每天看着位高權重的高官離地萬丈發言及推行搔不着癢處的政策，總會無明火起，幸好網絡仍有跟市民同氣連枝的作品，早於2014年雨傘運動便開始繪畫政治議題畫作的插畫家咳神和謝曬皮，最近也因繪畫同類作品贏得大眾讚賞，問背後有甚麼原因驅使二人創作？
咳神說：「由始至終，唔知係敢言定係衝動都好，見到啲好嬲或者好唔公義嘅嘢，就好想出聲，只係我選擇嗰樣係唔係寫嘢、唔係拍片，而係用圖畫表達不滿，社會有乜事，我都會好留意，特別係見到一啲警暴，自己有時真係好嬲，驚，但又要畫，有時畫完都會畀朋友睇吓，問佢哋咁樣畫會唔會有事。」謝曬皮也認同借畫畫抒發情感：「我由細到大講嘢唔叻，但畫畫就係最好嘅表達，好多時又係嬲，咁就成為我唯一發洩嘅渠道，同埋我都好驚將來創作自由會越嚟越收窄，咁你知所有嘢都環環相扣，將來如果創作自由收窄，唔好話講政治，講無聊嘢都可能會驚得罪人，我唔想有呢種恐懼，所以趁𠵱家繼續畫多啲。」
堅拒鬥黃 分散團結力量
問他們插畫界有沒有「藍」「黃」之分？如果自己是「黃」的話又有幾「黃」？咳神說：「我諗有嘅，不過絕大部份係黃！」謝曬皮說：「有藍咩？我冇見過藍嘅插畫師！我想搵張嚟笑吓都冇呀！」咳神則表示：「建制嘅插畫師立場一直都好鮮明，不過唔多囉，我覺得插畫界大部份都係黃，或者唔表態，因為好多都要顧住內地市場，但心底裏都係黃。我當然係黃啦，其實好簡單，反政府或者反對政權就係黃，無謂話要分到你幾黃呀？你要黃到黃金咁黃先得，我覺得最緊要你唔係藍，唔係藍我都OK！」謝曬皮說：「我都認同，𠵱家見到啲人要鬥黃，要攞個pantone出嚟鬥黃，搞到問我黃唔黃呢條問題唔知點答！」咳神補充：「大家唔需要諗得咁複雜，只要大方向一致，唔需要去check你邊樣有冇做、有冇捐款、有冇幫啲手足？最緊要我哋呢邊壯大，如果再咁樣係咁批鬥再批鬥，咪變咗越嚟越分裂，團結力量只會越嚟越細。」
問到近幾個月畫這麼多插畫，有沒有幾幅印象特別深刻或沒預料到這麼受歡迎？謝曬皮即嘲咳神說：「你有好多張都好受歡迎喎！好多都下下有20幾K！」害咳神一臉不好意思說：「我覺得其實好易取悅網民，差在你做唔做，我又唔覺係乜嘢一回事，畫一啲鬧政府鬧差佬嘅嘢，佢哋就一定會拍掌叫好。而我對你較深印象嘅插畫，就係沙田新城市shopping嗰張！」
風格與同理心 同樣重要
謝曬皮說：「嗰張係得到幾多迴響！嗰張畫好睇嘅地方係佢好超現實，一個人喺一堆暴力場面之中shopping。不過我最鍾意嗰張係我幻想2047年嘅香港嗰幅圖，我畫咗一堆人聚集喺一個廣場，搞個音樂會，音樂會有坂本龍一等歌手，背景係香港夜景，但就唔係乜中信大廈，係一啲我老作嘅香港本地品牌！」咳神最後選了一幅看更拜年的連環圖：「唔知點解畫親樓下看更嘅故事，啲人都好鍾意，今年可能有少少特別，看更攞利是好似過關咁，我問佢一句，佢要答番我一句，佢答得我滿意，我先畀錢佢，畫出嚟都幾搞笑幾得意。」
問二人有沒有期望自己的筆桿能為社會帶來甚麼改變時，咳神說：「自己心裏有個信念，希望影響到人哋，唔好乜都唔關自己事，自己行一小步，對世界都會有啲改變，可能諗得好偉大，但我自己就係受到某啲人改變，但我希望我可以做到呢個角色，畫嘅嘢令到人哋覺醒。」謝曬皮則說：「我就冇諗咁偉大嘅使命，如果講初心，最初做插畫冇諗過要改變人，都為自己未來而做，睇吓𠵱家自己做嘅嘢，影響到啲人，從而返轉頭影響返我。」
那麼插畫家最重要又具備甚麼特質？咳神說：「要好有自己個人風格，好表達到自己嗰樣嘢，一望到你嗰啲畫，就聯想到，呢樣嘢係屬於你！」謝曬皮則說：「我自己就覺得除咗咳神講嘅style外，最緊要有同理心，因為幽默感好需要有同理心，你要識得拿揑點樣講一個笑話，同埋遇到一啲社會事件，你係一個好有同理心嘅人，你個切入點會喺大眾嗰邊多啲去講件事。」
場地提供：Looms Cafe
鳴謝：香港人製造
謝曬皮
本名Jasmine Tse的謝曬皮為香港人氣女漫畫家，2012年因繪畫跟大眾審美眼光截然不同的公仔及畫風，展現獨特風格而殺入插畫市場。她於浸會大學視覺藝術系畢業後，再往倫敦藝術大學進修插畫，現於浸大任講師，謝曬皮的漫畫題材源自日常生活，涉獵政治、社會及娛樂等範疇，曾出版《偽都市傳說》等繪本，fb專頁粉絲超過15萬。
咳神
原名Cuson Lo的插畫家咳神，為香港著名政治漫畫家，於2009年起始於社交媒體發佈政治漫畫而打響名堂，簡約畫風輕易帶出插畫主題，並曾因議題敏感令fb戶口兩度被封，包括2014年繪畫諷刺一國兩制死亡的「滾水煮蛙」畫作，最新繪本作品除有《怪叔叔燑散步道》，他亦不時於擁有超過15萬粉絲的同名fb專頁發佈新作。