新亞師妹R因世界性疫情，本來已到手嘅聯合國實習職位被取消，現在要重新搵工，真的應了唱慣嘅新亞校歌（新一代校友稱之為院歌）嘅歌詞：「手空空，無一物，路遙遙，無止境……餓我體膚勞我精，艱險我奮進，困乏我多情……」以往吃盡低薪受老闆氣燄嘅校友F，現在已有資格申請做馬主，就安慰後來者師妹R千斤擔子兩肩挑，趁青春，結隊向前行。
校友F經過「餓體膚」階段後，現已進入收成期，曾講過有意競選議員，當日問佢：「中聯辦強硬路綫抬頭，睇怕要給你們泛民好看，你仲有冇膽參選？」校友F說：「一於謀定而後動，我猜測選舉主任會體會領導苦心，強力DQ泛民候選人，令泛民潰不成軍。劉教授（劉兆佳係校友F一輩嘅中大老師）在電台講到明，議員宣誓效忠『中華人民共和國香港特別行政區政府』呢一句，經人大釋法後，實質『立法原意』係『效忠中華人民共和國及其香港特別行政區政府』，任何人效忠『特區政府』，但有過反對『中華人民共和國』言論嘅，都可能被DQ㗎。」當年劉教授教書，理論多多，依家年紀大咗，就緊跟黨的路綫，相信唔會錯解中聯辦意思啩，新政制及內地事務局局長曾國衞上任，聲言唔會隨便DQ任何人，正是官樣文章，呢啲事，唔通要白紙黑字寫落審查候選人資格指引咩。
問校友F意見，泛民在九月有冇希望在功能組別有突破，佢話恐怕有心無力，譬如文化藝術體育界議員馬逢國係弱一啲，居然自認與體育界唔多熟，中聯辦已經預備換人。校友F話：「馬逢國會退下來，搵霍公子啟剛繼任，憑霍英東孫兒，霍震霆公子之名，體育界的選票可以攞晒，最近霍公子以港協暨奧委會副會長名義頻頻發聲促請政府支援體育界，重開運動場，就係競選前熱身啦，聽聞林大輝有意角逐，或者會有高人勸退都唔定。」好嘢喎，公子富三代咁容易上位，唔到你唔服。咁勞工界、餐飲界、交通界又點？校友F原來去年已做過沙盤推演，預備搶灘，但今年有疫情令局勢大變，校友F不表樂觀。佢話：「旅遊界還是有好多小微企，林鄭政府派錢，大公司無好處，小微企老闆收到錢就猛咁like林鄭，泛民難以在旅遊界別挑戰；勞工界搞新工會登記為選民，羅致光唱慢板說五十年未做得完手續，你知道係乜嘢一回事；餐飲界張宇人做咗20年，要推倒佢唔係咁易；交通界一向都係建制派世界，但最近聽到有內訌，因為保險公司要向的士司機加保費，65歲以上司機幾難買到保險，的士界選民想搵易志明出頭向保險公司爭取讓步，唔知易志明如何應付嘞。」