摩納哥中場法比加斯透露，佢95歲嘅曾祖母（圖）已經戰勝武漢肺炎，並形容曾祖母係超級女英雄。前西班牙國腳法比加斯早前表示，佢曾祖母喺巴塞隆拿一家安老院確診武漢肺炎，不過佢周三喺社交媒體上發文，透露曾祖母已經戰勝肺炎病毒。法比仔喺帖文中話︰「佢以95歲之齡克服咗病毒，噚日嘅檢測結果係陰性！」法比仔仲話︰「我曾祖母係超級女英雄，好在有任何時候都喺度付出嘅醫生同護士們幫助，等我哋可以喺咁艱難嘅情況下好好生活。」法比仔曾祖母呢次逃出鬼門關真係唔簡單，因為咁高齡嘅老人一旦確診武漢肺炎真係好危險，就好似曼城主帥哥迪奧拿咁，佢媽媽80幾歲就敵唔過武漢肺炎病毒，早前喺西班牙病逝。