花名「玻璃朱」嘅飲食界Blogger朱庭萱，本來冇乜人識，但舊年因為豬隊友放相上網，被踢爆靜靜雞撐警，佢爆粗叫人刪相釀關公災難，變成撐警KOL。對守法有種堅持嘅玻璃朱，近日被「專業清算師」團隊踢爆，佢嘅廚藝學校涉嫌違反消防條例，仲畀消防處都發信飭令改善。曾經叫人「犯法就係犯法！唔好再搵藉口」，呢個回力鏢真係中到應一應。
專業清算師促嚴正執法
專業清算師日前響fb出文承認責任，仲貼出一封電郵指，消防處今年1月兩次巡查玻璃朱嘅廚藝學校，發現單位內嘅消防喉同火警鐘畀木櫃阻塞，花灑系統亦出問題，違反咗消防條例，警告要限期內改善。消處巡查時仲發現廚藝學校無食物業牌照，將情況轉介畀食環署跟進。清算師團隊仲話，希望朱女士日後好好守法，仲hashtag咗「支持梁偉雄處長嚴正執法」，一班網友睇到鬼咁開心，留言祝賀玻璃朱。
不過玻璃朱非常不滿，響自己專頁大呻被打壓，怪責消防同食環係幫兇找佢麻煩。八方覺得Popo近日有句好應景，「有咩就同法官解釋！」行得正企得正，又怕咩畀人查呢？有網民喺佢專頁留言「啱喎，犯法梗係無藉口」，結果就畀玻璃朱block咗。八方想提醒，刪留言扮無嘢事小，無視消防安全事大，有事點賠返條命畀學生？