黎振燁與朱智賢周一被《蘋果》踢爆在車廂偷食蛋糕，黎振燁上月中更不陪孕妻產檢，反而陪朱智賢睇醫生。事件曝光後兩人一直深潛，直至前日無綫安排朱智賢開記招謝罪，被戴綠帽的謝東閔也要出席，更先代女友發言，反而偷食男主角黎振燁就冇影。
網民力數四宗罪
事後有網民鬧爆無綫及朱智賢四宗罪，包括拖局外人謝東閔認罪、將出軌事情合理化、以「抽離唔到劇情」為藉口及兩次出鏡卻拒向黎太道歉，無綫拆彈不成反縱火。
朱智賢偷食後，曾三次不認謝東閔為男友，僅稱兩人是「好朋友」，前日記者會卻拖對方落水。謝東閔先護花將罪名攬上身︰「我都有少少責任，可能我成日掛住工作，疏忽咗佢。」又指朱智賢是勤力的演員，似是力保女方事業，並營造「暖男」形象，可惜網友不受落，反被嘲諷「綠帽俠」。朱智賢在記招除了說了六次「對唔住」外，對偷食事件欠交代，只一直提到影響工作、劇組，對黎太隻字不提，態度敷衍。朱智賢隨後接受《東張西望》訪問，雖然爆喊，但依然不提黎太。
傳雪藏兩周復出
有指無綫因為鑑於朱智賢有三部劇未上，包括《踩過界II》、《愛美麗狂想曲》和《食腦喪B》，為免重蹈黃心穎覆轍要重拍，惟有諗計幫朱智賢洗底，待她過冷河兩周，便讓她重返《東張西望》繼續做主持。不過朱智賢以「抽離唔到角色」作藉口，卻牽動網民神經，紛紛圍剿︰「下次演妓女點算。」不希望她復出。
至於黎振燁妻子雖然沒有與丈夫上演「道歉騷」為偷食事件解圍，但據知她已經原諒丈夫，而黎振燁也誓神劈願不再偷食，兩人亦計劃待BB出世後，返回黎振燁父母長沙灣家中坐月。更有網友發現偷情男女當日的兩個蛋糕中，其中一個是購自藍店東海堂，網民寸爆兩人：「食蛋糕唔緊要，最錯係食着東海堂。」
曾任無綫藝人的王喜前晚也在fb貼文寸朱智賢︰「抽離唔到角色？哈！畀你撈到個角色鍾意食屎，伯母咪慳好多米飯？公司咁多過來人前輩做過咁多示範，你都毫無進步，以後點偷食，噢，sorry，點搵食？」與黎振燁同屆的港男梁裕恆也在Ig爆粗鬧黎振燁︰「賤X到，滾到毫無底線！諗住離婚就唔好搞大人個肚啦！」又指他很假︰「當年扮好男人極嘔心，一大班港男港姐傾偈，佢刻意行開話『我唔可以同其他女仔傾偈，費事老婆介意』真係over咗。」
撰文︰祖李