香港大學生申請到聯合國任職實習生，並不容易，今年畢業嘅新亞小師妹R（政治系）居然得咗，算佢本事，點知因為C19疫情，聯合國撤銷聘任，師妹R大為失望，佢話：「我查過資料，做完了intern，有八九成機會成為聯合國僱員，在紐約返工，與全球叻仔叻女交流，係我發夢發到嘅，但依家人生夢想畀肺炎病毒摧毀晒，真係好傷心。」唉，又係嘅，假若在聯合國做兩年，見過世面，學習打世界波，返香港考AO，機會好大，或者加入民建聯，寫字枱放個淘寶買番嚟嘅習近平瓷碟照，直情係重點栽培對象啦，跟住好似徐英偉咁做政治助理，升上局長寶座，指日可待。
校友F大笑：「左師兄，唔好玩師妹R啦，佢幫泛民派月餅，派口罩㗎！」唔，做民主派係講理想，做民建聯成員先至有做大官希望噃。校友F話：「現實一啲講，民建聯工聯會真係有錢得多，我地去年在深水埗派月餅，阿婆會問：『幾多個黃呀？』我地答：『純蓮蓉，冇黃。』阿婆嘅回應係：『唓，嗰邊派緊雙黃、單黃蓮蓉呀！』嗰邊咪就係民建聯囉，我地輸幾條街！」
未上過街，點會知道呢啲嘢，做地區工作係要在街頭貼地氣先至得。
校友F講及佢在1998畢業入傳媒做sales，第一份工月入七千五，股市大跌後，減薪到五千，後來老闆要炒佢，佢人急智生，話冇理由炒最低人工嗰個，老闆一聽，唔炒佢，改為立即炒月薪萬幾嘅高級營銷員，之後遇上科網股狂潮，薪水升番上萬幾，捱到2003年沙士，老闆又炒薪水高嘅員工，叫校友F用月薪三千五請新畢業生，校友F暗罵老闆無良，登報去請人，點知有幾百人爭幾份工，但請到嘅，一係做一兩個月就鬆人，一係完全冇料到，要即炒，說明經濟低潮時以低薪請人，就如英文嗰句If you pay peanuts, you get monkeys，最後老闆嫌校友F人工高，都係炒埋佢，於是校友F又要搵工，去到廣告公司，創作總監話：「你原來月薪4萬，我點請得起。」總監寫字枱上滿佈求職者CV，畀校友F睇到幾位申請人要求月薪二萬，於是大大聲講：「我一萬都肯做！」創作總監立即請咗佢，於是又重新捱過，返工日日畀總監鬧，將佢寫嘅廣告文字稿當住佢面用手撕爛，粗口鬧一輪，校友F一於艱險奮進，困乏多情，老闆向佢噴口水，唾面自乾，到經濟好番，時機一到，就轉咗去馬會，馬會薪高糧準，儲蓄幾年出嚟自行創業，幾年來順風順水，呢日講畀左丁山聽，想買馬做馬主，師妹R聽完佢嘅能屈能伸故事，覺得好勵志，但相信自己唔會有咁悽慘經歷啩。大學畢業要講時運，1998、2003及2020年畢業生係好值得同情嘅。