「我同跟大家一樣，都要呼吸、要搵食，跑得快唔可以當飯食。」三項香港長跑紀錄保持者紀嘉文最近以輪代腳，在自己的跑會因疫情零收入下，36歲的阿紀改行駕駛的士，他不怕被笑「兜踎」，感受最深的「侮辱」，反而是來自政府一次性的7,500元抗疫補貼。
記者：徐嘉華
攝影：董立華
問阿紀有沒有的士乘客曾認出他，他笑說：「有嘅，試過有客問我係咪紀嘉文，我答：『認錯咗』，唔係怕俾人認出，一睇張的士證就知，但疫情期間，唔想同乘客有太多嘢講，只想專心揸車。」
阿紀20歲已拿到車牌，在2011年、27歲時開「跑手堂」長跑會、28歲買自己第一部車，的士牌是在去年七月取得的，斷斷續續駕駛過數個月，先是去年下半年的抗暴運動，跑班減少了，當時當的士司機當作兼職，今年一月底開始的武漢肺炎，政府關閉運動場，平時在運動場教班的阿紀，高𥧌時1星期開5班，一班5、60人，月入超過30,000元。
武肺殺到，學生一個個打退堂鼓，他也說：「其實人心惶惶，疫情最恐怖係傳染率高，大家都驚有事，『限聚令』（3月29日至今）開始，我完全零收入，生活有一定壓力。」
特區政府本月8日宣佈第2輪防疫抗疫基金，每位註冊教練可獲單次7,500元補貼，這一點令阿紀火冒三丈：「呢7,500蚊簡直侮辱咗我哋做教練嘅人，其實香港疫情爆發到𠵱家呢個地步，係政府嘅問題，政府完全冇遠見，你呢個星期封呢樣、聽日又封另一樣，到上月底（3月29日）又推『限聚令』，係咪應該早啲推行呢啲措施？而唔係到疫情喺3月底爆發到600幾宗確診先推出？」
「食100餐就用完啦」
「我都好想知道，政府係咪肯定疫情會喺幾個月內就解決到？『限聚令』好快解除，我哋就可以照常教班呢？如果唔係，點解你可以決定一次性7,500蚊嘅補貼就夠？我覺得好無稽。」阿紀父母早已退休，仍未婚的他建議補貼要具「可持續性」，而不是一筆過：「7,500蚊食100餐就用完啦，好彩我未成家、冇小朋友，但好多教練有仔有女、又要供樓，好多人已幾個月冇飯開，政府應該簡化申請規則同程序，即時派錢，盡快救一救近火，因為好多同行等緊錢開飯。」
訪問這天是復活節假期，阿紀花了800元租車做生意，由早上11時開車，到見小記已是下午三時，他只接到一單生意，由西貢去東壩，一程約80元，之後等了個多小時都沒有客，惟有返回西貢，難怪阿紀也說生意難做，以前人等車，現在車等人。
今年1月滿36歲的阿紀，由中三參加中環「金一哩」路跑得季軍後，開始踏上長跑之路，足足超過20年，擁有三個長跑紀錄（見附表），去年二月香港渣馬以亞軍完成半馬後正式淡出，專心跑會教班，奈何過去一年抗暴運動加上未見盡頭的疫情，他不得不為生計另想法子。
「我真係諗過揸的士維生，起碼係一份較穩定嘅工作，近大半年揸的士嘅經驗，雖然係微利、賺唔多，但相對有保障，趁自己仲係三十幾歲，仲有機會轉行，就試一試。」訪問時N95不離口的阿紀，的士內防疫準備做到足，酒精搓手液、消毒噴劑及濕紙巾一應俱全，他也知駕駛的士屬高危行業，隨時接到武肺患者：「其實好無奈，教長跑係我嘅興趣、專業，但𠵱家跑班市場太飽和，加上疫情唔知幾時完結。」
「揸的士相對有保障」
11年順應渣馬越來越多人參加的長跑風，繼而開了「跑手堂」，回想這些年，沒選擇在浸大體育及康樂管理系畢業後找份安穩教職而選擇開跑會，阿紀卻沒半點後悔：「我細細個已經想建立自己嘅跑會，𠵱家睇番轉頭，當初我點解要成立跑會？除咗賺錢，跑步亦係自己興趣，又可薪火相傳，即使我真係轉行，都想繼續教跑，希望學生超越我，亦想提高香港嘅長跑水平。」
數不清跑了多少場比賽，獎牌亦多得早就不去計算，但在阿紀心中，最難忘的兩件事都是11年3月發生，第一個是大專陸運會的5,000米跑，跟同校好友陳家豪同場，阿紀當天早上已奪了1,500米跑冠軍，跟家豪的5,000米誰勝誰負都是自己學校得益，比賽中家豪一直領先，但突然有把聲音喚醒了阿紀：「今年係最後一年大專比賽，畢業後就唔會再參加，唔可以有遺憾」，於是一圈圈去追，他說：「最後幾圈，我當每圈衝400米咁跑，平均61、2秒1圈，最後以15分19秒反勝，真係好難忘。」
退居幕後堅持教跑
第二個難忘是同月在南韓仁川的半馬，在攝氏兩度嚴寒下，僅穿背心、短褲衝了個香港紀錄回來（1小時06分39秒），到現在仍未有人打破。
在長跑路上，阿紀不無遺憾：「就係未跑到全馬一個好時間，好想跑一次2小時30分內，但每次跑全馬都係抽筋收場，冇心機喇。」阿紀個人最佳的全馬時間，是16年福岡國際馬拉松的2小時30分37秒，腳傷也令他在去年提早退役：「我有努力過，但一努力腳就會傷、就會痛，苦苦堅持經已沒意思，所以退後一步，做幕後都開心。」
疫情令阿紀要駕的士幫補生計，但他不覺得是放下身份：「我跑得快都係以前嘅事喇，再過30年，其實都係nothing，但長跑係我嘅興趣，無論係『跑手堂』定係長跑教練呢個身份，再艱難，我都會一直守落去，勿忘初衷。」