北韓前鋒韓光成可以話係新一代嘅北韓國寶，喺卡利亞里踢出名堂嘅佢，竟因轉會祖雲達斯後長期只喺可以踢二隊，今年初決定離開意甲球壇，改投卡塔爾豪門艾杜哈尼。咁睇都好明顯係降咗grade，其實佢想重返歐洲球壇都未必咁容易，據英國傳媒透露，韓光成嘅足球生涯本來可以更上一層樓，甚至去英超球會效力，可惜因為國家嘅政治因素，加上受到國家領導人金正恩嘅長期監控，阻礙咗佢嘅發展，由明日之星變成悲情人物。
曾效祖記轉戰卡塔爾
韓光成係鄭大世後最有潛質可以喺歐洲上位嘅北韓球員，而且得到國家重點培育，細細個嗰陣已經被送去西班牙嘅巴塞隆拿青年隊學法，之後又因為喺2015年嘅U17世界盃表現出色，獲得意大利球會卡利亞里邀請加盟，然後借去意乙佩魯賈嘅青年軍接受磨練，之後就一直都喺意大利發展，後來返去卡利亞里踢出名堂，但去年夏天被祖雲達斯買入後就無法踢上一隊，短短半季就畀球會以700萬歐元賣去卡塔爾嘅艾杜哈尼，同另一位前祖雲達斯前鋒文迪蘇傑再做隊友。
事實上，韓光成今年只係得21歲，前途本來一片光明，衰在出生於一個極權、專制嘅國家，旅歐多年都冇辦法逃離北韓政府嘅監視。據英國《太陽報》透露，韓光成當年效力佩魯賈嗰陣，曾經有一次機會接受當地電視台訪問，不過喺訪問開始前有北韓政府人員要求取消訪問，之後就未有再接受過歐洲傳媒嘅訪問。報道仲話北韓多年嚟一直派人監視韓光成，金正恩仲曾經威脅韓光成假如喺外地有任何「行差踏錯」嘅話，就會將佢強制送返北韓，兼且對佢嘅家人不利。
英國政府施壓阻登陸
韓光成效力佩魯賈青年軍期間，據聞已經吸引到阿仙奴、利物浦同愛華頓嘅注意，有機會去英超發展，不過北韓多年嚟都被指剋扣向海外輸出嘅勞工工資，而有份向北韓實施經濟制裁嘅英國政府，就擔心韓光成一旦成為英超球員，佢嘅薪金亦會被北韓政府沒收用嚟發展核武，所以向英超球會施壓阻止佢哋收購呢位北韓球員，令韓光成冇辦法踏足英超大舞台。
政治因素阻礙下，韓光成嘅球員生涯發展未盡如意，如果佢出生喺朝鮮半島另一邊嘅南韓嘅話，唔知佢嘅成就又會唔會好似孫興民咁犀利呢？英國天空體育早前就舉行咗一次網上投票，由球迷選出英超史上最佳入球，結果踢緊熱刺嘅孫興民，靠上年12月對般尼嘅比賽入面狂奔70碼嘅入球，爆冷壓倒朗尼對曼城凌空倒掛金鈎等經典入球，成為咗史上最佳，唔知韓光成呢一刻有冇少少葡萄呢？