早排《動物森友會》俾香港玩家喺遊戲入面貼反送中同惡搞習近平圖片，搞到畀北京封咗，內地玩家只可以玩單機，冇得online玩，點知近日遊戲平台Steam又有人搞咗隻叫《冠狀病毒大進擊》（Coronavirus Attack）小遊戲，又充滿反送中、反中共同埋武漢肺炎元素，搞到連官媒《環球時報》都開炮。正當小粉紅又想出征之際，成個行動忽然冇影。有香港網民發現Steam疑似先發制人，封咗大陸賬戶，等佢哋冇得玩。
殺殭屍升級「光復香港」
《冠狀病毒大進擊》畫面用紅色背景，裏頭嘅冠狀病毒，同丹麥報紙早前畫、將中國國旗上嘅五星變成五個冠狀病毒漫畫有幾分相似，故事背景講一個會令人變成自私殭屍病毒正在擴散，帶原者紛紛逃離「WH.City」，為咗控制疫情，秘密實驗室創造出能消滅自私殭屍病毒嘅冠狀病毒對抗。成個遊戲擺明含沙射影，升級的方法就是注入「光復香港」、「時代革命」、「台灣中國一邊一國」等元素，仲要賣64蚊台幣，計港紙售18蚊。
好多海外同港台玩家講明「買嚟就係為咗睇nmslese高潮」，但有連登仔發現小粉紅搵唔到隻game，以為Steam下架，點知Steam原來直接封鎖中國IP，搞到小粉紅更加嬲，只可以係牆入面鬧，冇得出征！
李八方