現年33歲、被封「性女」嘅前港姐楊斯雅（Cindy）日前被爆搶人老公，為已婚嘅無綫前藝人、原名陳宇翔嘅陳光耀（Sammel）誕下一對孖仔，Cindy當日仲話「老公」早已同正室J小姐搞離婚，只係律師喺2012年「忘記遞上法庭」，更指對方2017年嘅結婚證書「可以係P圖」，稱「老公」同對方冇生小朋友，小女孩係親戚個女。
畀家用唔準時
身為正室嘅J小姐噚日現身受訪，直言感到委屈：「都有嬲，本來唔想再講，佢係要逼我出嚟講都冇辦法。」對於被指結婚證書係P圖，J小姐話：「偽造虛假文書係大罪，如果有證據，可以進行法律程序。」J小姐更拿出由澳門特別行政區民事登記局發出的「出生登記之敍述證明」正本，父親一欄寫明係陳宇翔。陳光耀婚後公然同Cindy擺酒，有冇考慮控告二人通姦？J小姐淡然話：「都有諗過，但係之後覺得唔好咁執着，我都唔想阻住自己過新生活。」J小姐表示去年10月自己提出離婚，一直分居至今，日前已正式簽紙離婚，佢話：「經濟上佢有照顧屋企，雖然唔係好準時，但佢都有做返爸爸嘅角色，都有返嚟屋企。」講到Cindy搶人老公，J小姐就仍然氣憤：「我梗係嬲啦，我10年青春呀！」
Cindy於2015年起同Samuel一齊開性商品店，噚日有報道指性商店疑似私售迷姦水，Cindy噚日回覆《蘋果》時話：「我哋𠵱家諮詢緊法律同警方嘅意見，事實係，我哋冇出售迷姦水！」Samuel喺電話中亦強調：「你係咪從我哋手上買呢支嘢先？第一，我有好多警察朋友同律師，第二你買咗返去，你冇當場搵警察捉我哋，你買咗返去你加啲乜嘢我哋唔知。」