武漢肺炎疫情肆虐之下，意大利成為歐洲重災區，各界都為抗疫出一分力。近日前意大利國腳名將費拉拿，就攞咗33年前球王馬勒當拿送俾佢嘅阿根廷國家隊波衫出嚟拍賣，最終仲以55,000歐元（約46萬港元）成交，呢筆錢嚟緊就會用喺支援那不勒斯嘅抗疫工作。當「老馬」本人知道呢個消息之後非常高興，佢仲喺費拉拿個ig留咗言打氣，話自己都想盡番一點綿力。
話說費拉拿早前就同另一位意國名將簡拿華路合作成立咗一個基金會，為佢哋嘅家鄉那不勒斯籌集抗疫嘅捐款，費拉拿為咗可以籌更多錢，就攞咗佢當年踢緊拿玻里嘅隊友馬勒當拿送俾佢嘅阿根廷10號波衫出嚟拍賣，仲以55,000歐元成交！「老馬」知道自己間接做咗一件咁大嘅善事當然非常開心喇，仲特登喺費拉拿個ig度留咗一段帖文；「我仲記得1987年你就第一次成為意大利大國腳，踢完場波就搵你交換咗波衫，估唔到33年前嘅呢件波衫𠵱家可以幫到那不勒斯，呢度係我嘅第二個家，喺度嘅人都係我嘅自己人，多謝你俾我再次感受那不勒斯人嘅熱情，我覺得非常榮幸！」