特區政府高層地震，幾個局長執包袱走人，咁佢哋班副局政助又點呢？其中一個被郁嘅前局長、財經事務及庫務局前局長劉怡翔，佢個政治助理、因同樣係女拔十優生而有政界麥明詩之稱嘅楊寶蓮，噚日就喺社交網宣佈離任，似乎要同舊老細共同進退。
感謝劉怡翔栽培教導
楊寶蓮2017年8月開始擔任財庫局政治助理，頭尾計做咗不過兩年幾，佢喺fb發文宣佈唔撈嘅消息，認為𠵱家係適當時候離開，展開佢事業同人生新一頁，又話接下來嘅時間會稍作休息，希望可以停一停，諗一諗，為未來新嘅挑戰做好準備。佢又多謝劉怡翔對佢栽培同教導，話祝願佢退休生活愉快，又祝願新局長許正宇同團隊一切順利。許正宇都有喺佢嘅貼文留言祝福，又話兩人一定會喺前路上再遇。 其實副局、政助係政治任命，新局長可能想自組班底，再有副局、政助唔撈一啲唔奇。