曾出任阿積士教練同管理層嘅前曼聯領隊雲高爾，近日指摘呢間荷甲班霸別有用心，想藉武漢肺炎疫情從中獲利。雲高爾不滿嘅係阿積士技術總監奧華馬斯，近期不斷鼓吹荷甲應腰斬賽季，並將冠軍頒畀目前排榜首、僅以得失球差領先阿爾克馬爾嘅阿積士。呢位先後執教過呢兩間球會嘅老帥話：「歐洲足協（UEFA）同國際足協（FIFA）已願意調整規則，同埋提供一啲餘地畀各國聯賽延遲，但有啲球會就為咗自己嘅利益，藉呢次病毒危機攞着數，𠵱家只係踢咗25輪比賽，球季嘅4分3，阿積士根本無資格成為冠軍，阿爾克馬爾同佢哋積分相同，根本就唔合邏輯。」另外，荷蘭雜誌Helden最近刊登咗阿積士中場雲迪碧克嘅一篇訪問，佢聲稱從來冇同皇家馬德里達成過任何協議。