武漢肺炎疫情下需保持社交距離，祖雲達斯嘅葡萄牙球星基斯坦奴朗拿度（C朗）為鼓勵球迷喺屋企做運動，發起「客廳盃」挑戰。C朗周日喺Instagram上載短片，表示有一個新挑戰畀大家去保持活躍，就係「客廳盃」，並問網友可唔可以打破佢嘅紀錄。C朗喺短片中瞓喺地上，做雙腿舉高以手指觸碰腳尖嘅小腹鍛煉（圖），結果佢喺45秒內做咗142次，表情睇嚟相當輕鬆，表現突出。早前確診武漢肺炎嘅C朗隊友馬度迪亦接受挑戰，仲以45秒做144次贏咗C朗，不過佢喺ig就話「兄弟你要咗我條命，下次我哋跑步！」至於今年初加盟曼聯嘅葡萄牙中場波基斯費南迪斯喺45秒內做咗117次，另一位曼聯嘅葡萄牙球員達洛治就做咗105次，二人成績都唔及得C朗。