【本報訊】做「黃的」司機本來就不容易，加上疫潮夾擊，生意難上加難。生計難捱，加上有的士司機因接客染上武肺，更添陰霾。「錢緊要，但身體更加緊要」。有黃的司機指，正如抗爭運動改變了港人生活習慣，今次疫症是一個契機讓的士司機審視甚麼叫社會責任。「唔好畀自己做播毒一分子，就係咁簡單」，他相信每個人多做些少，香港便可早日康復。
花名「十一」的黃的司機，平日主要用「同路人的士平台」接客，加上接載街客，一天大概載六至七個客人，生意只是疫症爆發前的三分一。最近關酒吧、限聚令陸續生效，街上人流沒有明顯減少，但「啲人喺同區活動多，無乜人隔區坐的士。」十一開玩笑說，畢打街是業界指標，現在每晚「舞火龍」，一排排的士無客到。
寧鎖車窗 拒載不戴罩乘客
早前有的士司機接載機場客人，之後一直發燒，但仍然開工，最後昏厥入院確診肺炎。「睇到新聞，驚囉」，十一坦言生意慘淡，去機場的「靚單」確吸引，但接客的底線是對方戴口罩，試過有乘客不戴，他寧願鎖車窗。「我無可能犧牲自己健康，同埋下一個乘客嘅健康」，現在每接完一個客，他寧願找位置停車，清潔車廂，手柄位、乘客安全帶會特別抹，「呢個就係我office，一日十幾個鐘，消毒咗至少安心啲先吖。為咗安全，有啲必須要付出。」
做的士這行，十一說客人甚麼人都有，有人將襪、珍珠奶茶、甚至鞋留下，現在最怕看到是「雲吞」，有客人將用過紙巾揳入門柄，十一立即叫對方「喂先生唔好意思呀，可唔可以拎返走，呢啲時勢我真係唔係好方便幫你執呀。」他上網看到冷氣口可安裝霧化酒精消毒車廂，他亦花錢自購。他最不願見到自己的車變成播毒工具，「前排喺深圳灣一車車出嚟，如果你部車有菌而你唔注重的話，喺個市區碌來碌去就變咗細菌炸彈，係幾無責任嘅事嚟。」
十一覺得抗疫戰爆發至今，一直是民間自救，最簡單的口罩都要靠市民自己撲，直至今天亦死不封關。最令他不齒是政府無心抗疫，特首林鄭月娥卻將市民自救功勞歸功自己身上。各行各業停業大蕭條，林鄭只「拍膊頭」叫市民頂住，十一說每個行業「跌錢」是預料之中，始終抗疫是共同目標，「但你要畀個希望我，係兩個星期？一個月？」可能連政府自己都沒有答案。
■記者歐陽聯發