效力商台20年的DJ蘇耀宗（細So）上周五突然被炒，當時他回應對商台決定感失望：「我覺得冇人情味。」翌日他在貝澳家附近接受《蘋果》專訪，強調無悔疫情期間為work from home的安排及減薪問題與行政總裁陳靜嫻爭拗，更指公司不應該將效率或利益凌駕於員工的安全上，他謂：「原來人情味得自己覺得有。」
現年40歲的蘇耀宗形容上周五是漫長的一天，但他感謝所有關心自己的朋友和聽眾：「大家毋須擔心，我冇特別唔開心，正如我所講，都只係失望箒。」20年來所有片段、經歷和回憶，夜闌人靜時一幕幕如flashback般湧上心頭。他說：「諗起我播過乜歌，講過乜說話，原來朋友同聽眾佢哋聽完後都袋咗，𠵱家到我用得着，佢哋就講返畀我聽，我當時都冇喊過，但𠵱家我真係有少少想喊。」感覺這些年每字每句每首歌都沒有白費：「我覺得自己呢20年冇枉過。」
做事光明磊落
遺憾是無法再透過音樂節目跟聽眾交流，諷刺是細So曾打算將一生奉獻在這崗位上：「我辜負咗大家嘅期望，辜負咗一啲習慣聽我節目嘅人。」細So直言佔了更多的是失望情緒：「竟因為一件咁嘅事唔能夠企到最後，記得我哥哥講過，只要做事光明磊落就冇嘢可以後悔，我夠膽講呢20年嚟我都係光明磊落，但換嚟係缺乏人情味。」
有指因疫情爆發，與上司陳靜嫻為在家工作安排及減薪問題有爭拗，代價是細So失去工作，如果有機會重來一次，細So表示仍然會據理力爭：「或者事前應該揭多啲書，希望自己聰明啲，睇吓仲有乜方法表達，但我真係無悔，我嘅智慧只能夠選擇咁樣去做，我唔會後悔。」他提醒各老闆：「唔好覺得同事喺屋企做嘢係偷懶，其實仲辛苦，多咗好多工夫好多聯絡，無可否認唔係每份工work from home都可以有相同效率，咁咪研究吓點提高效率囉，咁先至令世界同制度有進步。」可悲的是世界遇到問題後，大部份都會選擇解決提出問題的人，細So不吐不快：「因為係既得利益者梗係唔想變啦，但世界變咗。」
「有人忠言逆耳」
細So認為自己是以大家的健康安全作出發點：「無論乜情況下都唔應該將效率或利益凌駕喺員工嘅安全之上，係絕對違反人類道德，唔好同我講公司梗係賺錢，𠵱家係關乎道德嘅事，我唔會後悔講過呢啲說話，可能有人忠言逆耳，就有咁嘅結果囉。」
有網民認為現在的商台已漸變陌生，彷彿跟大眾越行越遠，細So說：「好似人情味，呢啲嘢原來得我自己覺得有，呢個世界到最後都係顧自己，好悲哀但係事實，無謂美化呃大家，只係無奈地我成為一個犧牲品。」
撰文：曹家誠
攝影：沈健程