利物浦一位患有焦慮症、正住喺隔離營嘅球迷Ben Price，意外收到愛隊最佳中堅華基爾雲迪積克（VVD、圖左）嘅視像電話，為佢打氣。雖係隔住電話螢幕見到偶像，但Ben第一句話就對VVD講：「我雙腳喺度震緊。」然後VVD就回應話知道Ben嘅困難，恭喜佢快將成為人父，仲話呢個係佢人生最美麗嘅事，鼓勵佢要珍惜當下，之後VVD再講：「我聽講你想成為髮型師，呢個係你嘅夢想，所以你就要向呢個目標進發，或者有一日你可以嚟到美活訓練基地，為我哋一班球員剪頭髮呢？」被VVD勉勵完一番，Ben不忘反讚對方加盟紅軍後，防線亦變得好似一磚牆，間接醫好自己焦慮症。