台灣性感女星43歲蕭淑慎早年因吸毒被捕搞到星途盡毀，2017年嫁年齡比自己細15年嘅老公梁軒安，早前為老公創立嘅公司拍慈善廣告後鮮有露面。蕭淑慎前日喺社交網站直播期間，自爆上年患癌，已接受手術切除十二指腸、胃部、胰臟頭、膽及膽管。
臉腫因食標靶藥
蕭淑慎透露上年2月底發現「人魚線好痛」，最初以為肌肉拉傷，三日後聽胞弟建議入醫院檢查，發現體內有8.5厘米大嘅腫瘤，醫生暗示腫瘤唔係良性：「我們祈禱這是從十二指腸出來，希望不是胰臟出來的。」佢話做咗好多檢查，之後開始到醫院接受治療，自此過住「標靶（藥）人生」，醫生指如果當時開刀，就必須要切除好多器官：「在那之後我很少post我自己的照片，我就很不喜歡拍照，我的臉就整個都是腫的，眼睛腫、嘴巴腫，有媒體說我整形，但其實是我不想解釋，我不想讓大家去擔心我。」直至上年6月腫瘤縮細咗一半，蕭淑慎喺9月再檢查就發現腫瘤變成3.8厘米，醫生話已到標靶藥嘅極限，最後佢決定喺今年農曆新年後開刀切除腫瘤。
擔心步劉真後塵
因當時見到劉真因心臟問題入院做手術後傳出命危消息，蕭淑慎坦承開始胡思亂想，但為免家人擔心扮鎮定。而佢父親喺內地返台灣，加上朋友為自己打氣，蕭淑慎表示入手術室前忍唔住喊：「我再醒過來的時候，我在加護病房了，身上可以插的管子都插了，鼻管、尿管，我全都插了，住院住了20多天。」佢又透露整個手術進行逾六小時，𠵱家身體康復得很好，自己又戒煙，唔使再食標靶藥，只需每三個月去醫院檢查。
撰文：馮仁昭