政府早前推出300億防疫抗疫基金，零售、餐飲、運輸業界都獲撥款救亡，但影視行業卻不在受助之列，失業電影人「一蚊都冇」。香港電影工作者總會會長田啟文指，「我哋都唔係鍾意攤大手板攞錢」，但現時全行陷入停業，擔心大批基層技術人員需要轉行。
田啟文冀留住人才
田啟文指1月起，總會與香港電影導演會分別向電影發展基金各申請1,000萬，預計若一切順利，4月中可獲批。總會計劃會利用撥款在5月前開拍一些教育片段，趁現時空窗期藉以提升業界基層技術人員。題材包括燈光、特技化妝、副導演等，動作指導則可拍攝槍戰、爆破、飛車畫面，「例如燈光師作用喺邊，假設拍一個室內酒吧，你點體現當時係黃昏定夜晚？用室內光定用補光？除咗燈光部門知道外，其他部門係唔知嘅，等基層人員了解對方點解要咁做，就唔係唔關我事」，製作教育片一來讓他們有工開，二來亦能學習其他部門技術，將來公開放映亦能提升公眾對電影的欣賞能力。
「總會之前都有搞電影培訓計劃，但着眼點係畀入行嘅人學基本嘢，等佢哋入行自生自滅，或透過拍攝吸收經驗，但香港近年製作量確實太少，冇咗通過開工進步，係咪可以通過其他渠道進步呢？」田啟文強調，1,000萬開不了多少套教育片，對從業員來說亦只是杯水車薪，他期望有第二輪抗疫基金出現，讓電影從業員不用告別電影。