13歲開始喜歡哥哥，讀書時已加入張國榮歌迷會。他的兄長阿德都是攝記，兩兄弟都是哥哥的鐵粉，「當年阿哥攞歌迷會表格畀我填，結果我入咗會，之後歌迷會叫我上《歡樂今宵》玩遊戲，16歲第一次見到哥哥真人，好靚仔，最記得哥哥自己設計遊戲，有兩個箱，一個裝清水，一個裝墨汁，掂到墨汁就贏，結果我僥幸攞冠軍，下次見面哥哥叫我『墨汁仔』，再之後叫我『阿仔』。」當時禮物有一套黑膠碟外，哥哥還送了第一次演唱會戴過的心口針給他，阿John珍藏至今。
一齊食印尼炒飯
「記得第一次同哥哥影合照，自己心跳得好快，緊張到眨咗眼，只係影得一張相。」因為家裏開設影相舖，阿John和兩位胞兄都懂攝影，三兄弟都是哥哥的鐵粉，之後歌迷會會長邀請阿John做組長，幫手影歌迷會活動，兩位兄長都有幫忙影相，哥哥為答謝他們，請三兄弟到淺水灣酒店食飯，「最深刻我哋拉閘唔做生意，坐的士飛去酒店，遲到大半小時，『唔好意思，我哋遲到。』心卜卜跳，心跳加速，但哥哥冇嬲，佢問我哋想食乜？好有印象哥哥食緊印尼炒飯，所以我哋都食印尼炒飯，大家傾偈，仲記得當時心情，眼前天王巨星完全冇架子，之後仲車我哋去中環，好記得我問哥哥，《妳在何地》係咪好難唱？佢話呢首唔算難唱，《追族》仲難唱。」
入行後，阿John到新城採訪哥哥和林憶蓮，再有機會見面，「哥哥，好耐冇見。」哥哥依然好nice：「係呀！」之後，哥哥的活動、演唱會、記者會，阿John都有採訪；最後一次「見」哥哥，是2003年出殯當日，「我早上影靈車離開殯儀館，雖然心情好悲傷，但好想去影呢張相！記得係自己自發要求去影，記得當日C1出殯新聞，我同公司要求攝影出自己名，最後呢張相，我想同哥哥講，『之前幫你影過好多相，最後呢張，好悲傷，想作為向你致敬。』」
阿德製Figure致敬
阿德是哥哥的鐵粉，曾親手製作哥哥的figure向偶像致敬，最記得有三件事，第一件：「有日，公司叫我趕去半島酒店，收到風哥哥去食飯，我好快到咗，但唔知哥哥喺邊度食，自己唔知應該喺邊度等，惟有喺大堂coffee shop附近，見到有柱位，坐低等咗一陣，突然有人走埋嚟問我：『喂，你等邊個？』我岳高頭一望，唔夠一呎距離，原來係哥哥。」因為弟弟阿John是歌迷會組長，阿德曾義務幫歌迷會影相，「所以哥哥記得我，我話等你囉，跟住幫哥哥影咗幾張相，之後記者到，哥哥一路行一路講，入咗酒店嘅雪茄店，買完雪茄截的士走。」
着涼鞋門口受訪
第二件，「有年記者收到風，哥哥去麗晶搞派對慶祝生日，公司安排大部份記者採訪，見到關之琳等好多朋友出現，哥哥知道有記者等，出來同大家傾偈，又影合照，好好人。」
第三件，「有年哥哥搬去加多利山，公司叫我哋去等佢入伙，記得哥哥好風騷，着住涼鞋、攞住鎖匙走出門口，接受記者訪問，仲同記者好好傾，佢真係好好人。」
採訪：余燕儀