現年43歲的敖嘉年拍完劇集《伙記辦大事》便離開工作22年的無綫，雖然已離巢，但他直言公司錫自己，雙方關係良好。自稱是自卑的人，敖嘉年最難忘入行時被前輩寸「樣衰」、被清潔女工嘲「茄喱啡」，自信心受打擊，猶幸得堪輿學家朋友點醒，努力堅持，終於捱出頭。
撰文：嵐山
攝影：沈健程
敖嘉年決意離開，但對無綫沒半句怨言：「公司都想我4月開劇，但我接咗個舞台劇同電影，拍唔到，睇吓未來再以乜形式合作，公司好錫我，話延遲一年再搵我。呢行努力未必有回報，見過好多好勤力嘅演員都係鬱鬱不得志，我算幸運，年年爆騷。」
多年來敖嘉年有機會嘗試不同角色，扮過江湖大佬，又在《魚躍在花見》演智障人士等，他曾是無綫前金牌監製李添勝的御用演員，令人印象最深刻，他在《巾幗梟雄》系列先演敗家仔蔣必文，為他贏得飛躍進步男藝員，而續集演被欺負的「排骨仔」，亦獲提名男配角。敖嘉年說：「個個都想做男主角，但未到你咪安守本份做好自己角色。冇諗過排骨仔咁犀利，播咗3集後，已經有前輩喺西餐廳同我講『你從今之後唔同晒㗎嘞』，黃智賢、導演、監製都恭喜我。」
「情緒起伏好大」
敖嘉年中五畢業後做過電台DJ，1998年加入無綫做藝員，由《城市追擊》主持開始，但剛出道便遭前輩挖苦打擊自信：「入去《城追》第一個月，已經有前輩話『𡃁仔，你咁嘅衰樣，今年如果冇乜特別就唔好做嘞』，心諗我唔係好差啫，有諗過係咪簽埋呢年就唔簽。」打擊不止一次，他續說：「好多年前，試過同屋企人去商場，有幾位清潔阿姐經過，好大聲話『嗰個茄喱啡嚟之嘛』，屋企人又火爆，我話『算喇算喇，我哋走』，佢哋或者係無意，但好深刻留喺我個心度，好唔開心。」基於自卑，敖嘉年經常萌退出念頭：「我噚晚都有諗唔做，我好自卑，唔靚仔、唔高大，到𠵱家都唔係太敢睇自己演出，成日覺得做得差同醜怪。曾經有個堪輿學家朋友同我講『你情緒起伏好大』，叫我小心，但亦因為咁，先可以演到唔同嘅角色，要學懂控制。」天生有把靚聲，敖嘉年除了幕後配音，還周圍登台搵真銀，近年更拍電影《盜墓筆記》及《葉問》系列等。
「阿媽叫唔好生」
談起結婚四年的圈外太太Betty，敖嘉年指太太較低調，所以談到對方時有點避忌，而兩人合作開的廣告公司，在疫情下生意仍可維持，但造人計劃就沒有想過：「阿媽都叫我唔好生，社會咁辛苦，湊小朋友好大壓力，呢個年代冇所謂，最重要家人開心。」
髮型：Alva of HAiR
化妝：Rigel Ng of Rigel Beauty Art
場地提供：體藝會