【爆相爆片】周潤發母親陳麗芳上個月13日離世，享年98歲，家人低調為發媽辦喪禮，前日舉殯。發媽走得安詳，發哥心情平靜，噚日如常同廖啟智（智叔）、米雪、白只等圈中行山好友一齊去行山，之後再到九龍城行街覓食，一向「貼地」嘅發哥，為即時享用美食，無懼疫情暫時唔戴口罩。
讀者程先生透過《蘋果》「爆相爆片」分享，噚日朝早約10點半喺九龍城遇見發哥戴上cap帽、着長袖樽領衫同背心，一身灰黑運動裝打扮嘅發哥，如往常一樣，可能因為方便邊行邊食，發哥全程冇戴口罩。程先生透露：「當時見到發哥落車，去咗買麵包食，又入咗間粉麵舖買嘢，跟住再去雜貨舖，同班行山友圍埋傾吓偈，去咗幾間舖頭，拎吓嘢嚟食咁，全程冇戴口罩，逗留咗個幾鐘至離開九龍城。」
福氣夢中離開
《蘋果》噚日致電智叔，講到有讀者見佢同發哥、米雪一行人現身九龍城，智叔話：「呢排個疫情，我哋都係行山多嘅。」發媽前日出殯，對於發哥心情係咪已經平復，智叔話：「發哥同媽媽關係一向好好，媽媽離開對佢一定有衝擊㗎啦，但佢好豁達，佢話媽媽咁長壽係福氣，喺睡夢中離開係福氣，反映佢心情安慰嘅。」發哥係行山發燒友，香港嘅大小行山徑對發哥而言都瞭如指掌，對於噚日去邊個山？智叔故作神秘話：「星期日我哋通常去啲人少嘅地方嘅，邊度就無謂講啦！」