呢排冇晒商業飯局，一眾老友飯局亦徇眾要求延期至疫情消失為止，於是左丁山搵老友吃午飯，每次搵一位，約親都中，因為對方亦係多數冇咗約會，標準反應係：「你敢出來吃飯？」唉，幾十年來都未見過香港人咁驚恐，連衞生署都勸市民唔好探訪阿媽，用互聯網見吓面好了，你估阿媽真係識得上網用Zoom咩！左丁山對此不以為然，但好奇問吓幾位年青人，竟然得到如下答案：「係呀，阿嫲話呢排有啲唔舒服，阿媽唔敢去探佢，話要聽衞生署嗰位張醫生忠告喎！」阿嫲咪好傷心？邊個照顧佢？年輕朋友話：「阿媽住喺灣仔，阿嫲住北角，我自己在機場返工，搬咗去東涌，依家都唔知去探阿媽還是探阿嫲，阿媽唔敢去北角，又叫我唔好返灣仔。」咁就變成「自我封關」，有違五倫，沙士時期都冇咁荒謬之事，可知呢次COVID-19造成嘅人情傷害係世界性。在中國大陸，武漢人飽受歧視，北京明令不准湖北人入京，凸顯中國社會主義模式管治之優越感，即是「北京」一聲令下，全國遵從，北京是首善之區，中央領導人所在地，一定要棄車保帥，封死湖北，保存北京及其他省市，武漢不幸首先出現COVID-19，武漢人只能認命，習近平調自己親信人馬去湖北監控，就係驚湖北會有漏網之魚也。相形之下，意大利美國民選模式梗係輸蝕啦，亂晒大龍㖭，惡佬特朗普都無權下令西雅圖封關，首都華盛頓特區市長不能下令禁止華盛頓州居民進入華盛頓特區，幾冇用呢！武漢人死就死啦，不敢哼半句，加利福利亞人民就可以隨時反對政府，向特朗普總統說不，搞司法覆核，美國幾冇效率呀，抵美國亂作一團。
疫情係可以控制嘅，問題係成本為何，at what cost？中國大陸裏面，自由法治人權不值一文，算係冇成本，唔駛理，只須計算經濟成本，即封關封村帶來之工業停擺，出口停頓，消費大跌之下，GDP增長損失咗幾多個百分點。西方呢，真麻煩，要計埋控制疫情帶來之human cost，抽象到死，點計呀，唔怪得兩個星期以來藍絲不斷出微博，高呼中國模式偉大優越，世衞組織話世界欠中國一句多謝（按，聽咗想作嘔）。前中聯辦副主任，北京大學法學院教授強世功批評：「這次武漢疫情暴露出我們國家治理中面臨的兩個根本性問題……」講還講啫，講一次就受到監控，對藍絲而言，中國模式最優越，總之聽黨話，跟黨走，黨主導一切，愛國人士不用思考，好舒暢啫！