英格蘭足總盃周四踢埋16強最後一場比賽，由曼聯作客有前隊長朗尼壓陣嘅英冠球隊打比郡。紅魔自從冬窗加入波基斯費南迪斯同恩哈路後，真係漸入佳境，而呢場波就先靠勞基梳爾33分鐘射中連格背脊改變方向嘅入球打開紀錄，然後恩哈路再梅開二度，成為紅魔大勝3:0晉級嘅功臣，可以話搶去倒戈嘅朗尼風頭。
不過，轉型踢中場嘅朗尼呢場波其實表現唔遜色，防守時完全唔錫身，落腳飛鏟非常有「球味」，仲有兩腳中框罰球好有威脅，但兩次都俾今場代替迪基亞把關嘅羅美路撲出，搞到網上好多魔迷怪責呢位門將太「盡責」，連朗尼賽後都講笑話自己補時階段射嗰球咁靚，好心羅美路就讓一讓路畀佢幫打比郡破蛋。
至於曾經同朗尼係隊友嘅紅魔主帥蘇斯克查，賽後亦再次肯定朗尼喺曼聯呢間球會嘅地位同價值，話所有紅魔球迷都好鍾意佢，亦感謝佢為球會做過嘅一切，就以呢場波為例，已經顯現出佢嘅「卡士」。另外，蘇B亦有大讚入兩粒嘅恩哈路，話好高興可以引入呢一類型嘅前鋒，仲話如果呢位射手幸運啲，呢場波分分鐘有得「戴帽」。
馬古尼或缺席曼市打吡
曼聯晉級後，八強所有對碰都已經產生，佢哋會作客前一日淘汰熱刺嘅諾域治爭入四強。不過，呢場波就今月下旬先打，反而紅魔應該擔心賽前扭傷足踝避戰嘅隊長哈利馬古尼，因為佢好可能缺席聽日英超對曼城嘅打吡戰。