外號元秋嘅民建聯立法會議員蔣麗芸，前日喺facebook拍片，引用香港標準及檢定中心（STC）嘅報告試圖力證作「翻蒸」口罩偉論有根有據，結果即日畀衞生防護中心出po反駁，強調外科口罩唔可以消毒重用，點知噚日就連STC都就事件發聲明同佢割席，不點名指相關報告只係涉及「一名巿民」提交嘅樣本，而報告「僅提供測試數據，而沒有作出任何結論」，擺明話元秋嘅偉論同佢哋冇關。
STC噚日喺facebook貼出聲明，話「一位巿民」喺2月6號提供咗啲口罩樣本，委託該中心進行「微粒子過濾效率」（Particulate Filtration Efficiency, PFE） 測試，其間要求中心將樣本分成兩部份，一部份樣本不做任何處理，另一部份則喺攝氏一百度下蒸10分鐘，再分別記錄數據並作出報告。
STC：提供數據非結論
STC話，現時巿場上嘅口罩大多數要通過細菌過濾效率測試（BFE%）、微粒子過濾效率測試 （PFE%）、壓差測試、合成血液穿透性測試同燃性測試，而PFE測試只係安全標準嘅眾多測試中，「其中一個內容要求」，變相為元秋嘅偉論插多刀，根本冇話可以「翻蒸」口罩重用。