皇家馬德里喺星期日嘅國家打吡終於威番次，憑雲尼斯奧斯祖利亞同馬里安奴戴亞斯各建一功，主場以2:0贏咗宿敵巴塞隆拿，一報過去七戰西甲不勝之仇，賽後仲以一分反壓巴塞重登西甲榜首。
皇馬由17/18球季開始已經連續7場喺國家打吡贏唔到巴塞，兼且喺班拿貝球場連輸四次聯賽賽事，不過今場唔知係咪因為有前射手基斯坦奴朗拿度親自飛番嚟觀戰，皇馬班球員踢得寧舍醒神。皇馬今場兩個入波都係喺下半場出現，71分鐘先有雲尼斯奧斯接應卻奧斯傳送後推入禁區起腳破網，到補時階段再由後備入替嘅馬里安奴接應界外球後，右路殺入禁區窄位射入，最終贏2:0，賽後以56分升上榜首，領先巴塞一分。
今場除咗係皇馬自2014年10月後第一次喺西甲主場贏到巴塞，雲尼斯奧斯仲以19歲233日之齡，打破美斯喺07年創下嘅紀錄，成為21世紀最年輕嘅國家打吡入球球員㖭。輸波之餘連紀錄都保唔住，難怪美斯賽後咁失望喇。