警務處處長鄧炳強噚日去視察火炭駿洋邨，之後見記者，佢講到罪案數字上升，話因為反修例運動，又話市民守法意識越來越薄弱，之後仲不點名寸公民黨立法會議員楊岳橋，「有啲人話有刑事案底令人生更精采」，教唆他人犯罪同造成社會守法意識薄弱喎！但八方翻查資料，原來楊岳橋喺2017年講呢句嘢，而且前文後理根本同教唆他人犯罪無關，PK鄧好嘢到將人3年前講嘅嘢，屈落3年後反送中運動，真係令人嘆為觀止。
市民：警暴入得曾偉雄數？
其實楊岳橋講呢句話，係2017年去聲援反東北案被告集會入面講，聲援一班喺反東北案同衝擊「公民廣場」案嘅人，根本就同今次反送中運動完全無關，而楊之後亦為自己呢句話致歉，但PK鄧好嘢在將兩個完全唔關事運動拉埋一齊，仲要講到話係教唆他人犯罪，其實呢句嘢冇乜人再記得，連建制派都冇人再拎出嚟講，更加冇將呢句嘢同反送中拉上關係，係得PK鄧咁做，似乎PK鄧想砌民主派嘅野心，比建制派仲狠！
又有人話，若然PK鄧用3年前說話入人罪都得，2014年佔中運動，差人濫暴嚴重，廣受輿論批評，但當時嘅警務處處長曾偉雄仲同差人講「你哋冇做錯到」，咁又可唔可以話，差人日後濫暴濫用職權行為越嚟越嚴重，就係因為曾偉雄呢句死撐差人嘅說話引致？
李八方