洪朝豐六十大壽，慶賀抗癌成功、浮過生命海、邁過一個甲子給他自己一份大禮；出櫃兼著書，媒體訪問無任歡迎霹靂啪喇情史大披露。
我間Gym個廿零歲教練小花竟然問我：邊位係洪朝豐？寶詠琴又係邊個？
寶小姐前夫係大劉，一講甘比個老公劉生，小花立即清楚明白（後生細女點會對Hermes嘅Kelly Bag、Birkin Bag冇興趣？）呢啲先叫今時今日人事。無辜辜，寶小姐一次又一次被後人人氣關係脈絡拉出嚟鞭屍，慘！
網絡世代至殘酷嘅事實；現兜兜摑你幾巴掌，證明時不我與，瞬間變身成為上一代、上世紀嘅「前人」！
也有八卦物類奔走相告：吓！唔係嘛，而家宣佈出櫃？以為蘇施黃話齋：「Understood啦！」
有啲嘢唔使講，人人通透明白，不禁問：有邊一忽唔似箒？
都無謂引班90後、2000後嗤之以鼻：邊位阿伯嚟㗎？邊度仲有人介意出唔出櫃呢回物事箒？Out咗啲喎！
班諸事八卦鹹濕淫蟲阿伯嘅反應：超！邊個咁×得閒知你幾時幾時識過咩嘢人、拍過咩嘢拖箒？過咗三十歲，Gay場無真愛，十個佔咗九個半唔係肉慾就係錢銀名牌名錶名包靚車同層樓嘅關係，咪拎情史做擋箭牌，唔興㗎啦；不如講肉嫩汁多嘅性史啦，都或者會引起小小性趣嘅！
咁又係喎，煲咗成篇蘋果娛樂C1（26/02/2020），由18歲講起，隻豬畀咗個鬼佬開始；全部幾時幾時同乜嘢人（女同學、前妻、鬼佬、寶小姐、新疆男……）都係情史，又非江紹祺著作《男男正傳》（電影《叔．叔》之前傳），情方面悲涼，慾方便失望。如果Sell洪朝豐三個字，早應廿幾年前，仍然電台DJ男2號（當年男1，始終顏聯武）或與寶小姐拍拖風風火火時期便應身先士卒出櫃行動，著書立說弄個前無古人嘅牌坊，無論鄧小宇、邁克、小明雄、李志超……無人可望項背矣！（待續）